Zotung Bu Hnih Nih Cathanh Chuah in Dr. Thlaawr Bawihrin Ralrin Pek

| The Chin Journal | Hakha, Chin State

Zotung Lungngin Bu (ZLB) le Zotung Organization of America (ZOA) nih May 2 le May 1 nithla khenh in CBC USA General Secretary Rev. Dr. Thlaawr Bawihrin ralrin peknak cathanh an chuah, tiah theih a si.

Atu bantuk in ZLB le ZOA nih Rev. Dr. Thlaawr Bawihrin ralrin an peknak aruang cu aluancia March 28-30 ah rak tuahmi CBC USA BT meeting ah Zotung pawl limhaang chiatchuah in Rev. Dr. Thlaawr Bawihrin nih bia a rak chim ruang ah a si.

Cu BT meeting ah cun Rev. Dr. Thlaawr Bawihrin nih, “Khumi nih hin Zotung pawl nih Kawlholh holh ahcu khamhnak kan hmuh lai ti tluk in an ruah bantuk khan Khumi pawl nih hin Rakhine holh holh ahcun fim ah an ruah ve…” tiah a rak chim.

A cunglei bia a chimnak cu Youtube le Facebook ah video zong in tar a si i Zotung kan unau hna karlak ah lungfahnak nganpi a chuahpi.

Kan unau Zotung hna lungfak ngaiin an um ko nain atu tiang ah Rev. Dr. Thlaawr Bawihrin nih a chim ciami kong ah tuanvo laknak le chimfiannak pakhat hmanh a tuah rih lo tik ah ZLB nih cun “Chinram rak ra in Rev. Dr. Thlaawr Bawihrin pumpak nih chimfiannak rak tuah seh. A tuah lo a si ahcun ZLB nih a herh ning in kan rawlrel lai,” tiah an langhter.

Cun, ZOA zong nih, “Rev. Dr. Thlaawr Bawihrin nih khua tuaktaan loin a chimrelmi cung ah ZOA kan lung a tling hrimhrim lo. Hi hnu pinlei zong ah miphun huap piin a hnorsuangtu ding biachim hi i ralring cang seh,” tiah cathanh ah an langhter.

Latest News