/

ZCD Teinak Hmun ah Vote Hleihluat in a Chuah Caah Vote an Rel Than Lai

The Chin Journal | Hakha | Chin State

Tongzaang peng, Ramkulh Hluttaw-2 mehmun ah vote thla khotu milu cazin nakin tam in vote cazin a chuah caah vote an rel tthan lai, tiah Chin ramkulh Election Commission nih ca a chuah.

Hi mehmun ah hin vote thla khotu milu 8,047 an um nain vote a chuakmi a dihlak an fonh tik ah 12,000 leng a si i, vote 4,000 leng a tam.

Cuka hmun ah cun NLD, ZCD, USDP telh in party panga an i zuam hna i, tuan deuh result ah ZCD nih 7,274 le NLD nih 5,444 tiin an hmu hna.

Cucaah, vote rel tthannak a thar in kan tuah cuahmah tthan i teitu a thar in thawngthanhnak kan tuah lai, tiah Chin ramkulh Election Commission nih thawng a thanh.

Tuan result ning ah NLD nih Chin ramkulh ah hmun 36, ZCD nih hmun 1, CNLD nih hmun 1 tiin an hmu i, atu ah ZCD teinak hmun khat hi a hun fiang tthan lo.

Hika hmun ah hin Chin ramkulh zatlang lei vuanci Pu Pau Lun Min Thang nih ZCD in teinak a hmuhnak a si.

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19