Zarh Khat Voi 3 Ngakchia Pawl Rawl an Dangh Hnanak Hakha Sianginn

| The Chin Journal | Hakha, Chin State

Hakha khuachung ah siangngakchia pawl zarh khat voi 3 rawl an dangh hnanak acozah sianginn pakhat a um. Cucu, Hakha Khuahlun sang ah a ummi Farhrual Primary School a si.

Photo – Hakha IPRD

Hi sianginn ah hin siangngakchia 42 an kai i zarh khat ah cacawn nikhat ni, nihnih le nithum ni ah hin chuncaw an dangh tawn hna.

“Siangngakchia pawl thianghlim tein eidin an thiam nakhnga le pumsa ca ah vitamin a ngeimi tirawl an eidin khawh nakhnga tiin dawtu hna nih an hlutmi in hi program hi kan tuahmi a si. Zarh khat ah cacawn nikhat ni, nihinh ni le nithum ni ah chuncaw dangh an si. Siangngakchia 42 an kai i voi khat rawl dangh ah Ks 20,000 hrawng a dih,” tiah siangngakchia ngandamnak lei tuanvo ngeitu Dr. Thang Hnin Lian nih a chim.

Photo – Hakha IPRD

October 7, zinglei ah Dr. Thang Hnin Lian te cu Farhrual sianginn ah an kal i ngandamnak lei fimchimhnak an tuah pah i siangngakchia hna he rawldum tinak zong an ngei hna.

Photo – Hakha IPRD

Hika sianginn ah an tuahmi siangngakchia ngandamlei program bantuk hi a dang Hakha khuachung sianginn pakhat zong ah tuah chap ding in timhtuahnak an ngei i siangngakchia hna caah hlut a duhmi dawtu mipi zong nih hlut khawh a si, tiah thawngthanhnak zong an tuah chap.

Latest News