Zaankhuadei Game aa Celhmi Kum 17 Tlangval a Computer Hram ah a Thi

| The Chin Journal | Hakha, Chin State

Zaankhuadei Game kah in caan a hmangmi Thailand tlangval no Piyawat Harikun (kum 17) cu a Computer cabuai hram ah a ruak in an hlawm, tiah theih a si.

Harikun kun hi October thladongh lei hrawng khan cun Game aa kah tuknak ah sianginn kai zong a bau lengmang cang.

Hringtu a nulepa nih, “Game kah in zaankhua a dei tawn i, khua a dei zong ah ih hlei loin thlalangawngzaar a thlak hna i cuticun pehzul in aa kah tawn,” tiah an chim.

Tlangval no Harikun te chungkhar hi Thailand ram nichaklei Udon Thani ah khua a sami an si.

Zaankhuadei Game aa kah pin ah rawl ei zong a thei tawn lo i, a nulepa nih Game aa kahnak a khaan ah rawl an vung pek tawn.

Tutan zarh cacawn nikhat ni zinglei ah ah Harikun a pa Jaranwit cu a fapa ihnak khaan an vung lut tik ah a fapa cu a Computer hram ah cawl loin a rak rilhmi a hmuh.

Jaranwit nih, “Ka auh i ka hlauh len nain a cawlcaang ti lo. A rak thi cang,” tiah palik sin ah a chim.

“Ka fapa hi cathiam ngai a si ko nain game kah nih a suai tuk i ralrin ka pek len ko nain aa tthinh kho lo,” tiah a chim.

“Ka fapa atu bantuk in a nunnak a liammi hi hawidang nulepa hna le fale caah cawnpiak ttha tu ah si hram ko seh. Fale nuncan ziaza a rawh lo nakhnga fak deuh piin kan zohkhenh hna a herh,” tiah a nunnak a liammi Harikun i a pa Jaranwit nih a chim chap.

-NST

Latest News