Yuzana Teih-khan ah Nungak Tlangval a Thattu Pa an Tlaih Khawh Cang

| The Chin Journal | Hakha, Chin State

Yangon ramthen, Dagon Seik-kan peng Yuzana Teih-khan ah nungak tlangval a thattu tlangval pa tlaih a si cang tiah Myanmar ram palik nih thawng an thanh.

Hi kong he pehtlai in Dagon Seik-ka peng palik bawi Maung Maung nih “Tanintharyi ah kan tlaih khawh, mithattu kan sin a phanh rih lo caah a thatnak kong kan hal kho rih lo” tiah a chim.

Thil sining cu Yuzana Garden City, A (9) street, Teih-khan No. 5/204 ihnak khan chung ah kum 27 tlangval Hein Min Aung le kum 23 nungak Ma Myint Myint Win cu March 6, zaan suimilam 7:00 ah namte sawhnak hliamhma he an ruak an hmuh hna.

Mithattu Phoe Htet (kum 22) cu Tanintharyi ramthen a chungkhar hna sin ah a zaam ti thawng an theih hnu in palik nih an kawlhawl. March 7, chun slm. 12:00 ah Phoe Htet cu Meik pengkulh khuate pakhat ah an va tlaih khawh.

Mithattu le thah a tongmi 3 hi dawr pakhat ah riantuan tti hawikom an si. “A dang riantuan tti an hawile chim ning ah cun, hi hna pathum hi pakhat le pakhat pehtlaihnak an ngei, a thimi pahnih hi aa duhmi an si i living together in a ummi an si. Mithattu pa nih nungak nu hi a rak duh ve caah atu bantuk thil a can hi a si kho” tiah palik bawi Maung Maung nih a chim.

Cun, kiangkap minung hna chim ning ah cun, March 5 zaanlei sang ah tliklek thawng kan theih tiah an chim. An pathum in riantuannak hmun an rat ti lo ruang ah an inn an va kal hnawh hna i ruak in an hmuh hna hi a si.

-Irrawaddy

Latest News