Yangon Lai Kumthar (THO) Sunglawi Ngaiin Tuah a Si Lai: October 19

| The Chin Journal | Hakha, Chin State

Tukum Yangon Lai Kumthar (THO) cu October 19 ah Hlaing Mingalar Hall (Tamine Lansone pawng) ah zinglei sml. 9:00 in zanlei sml. 5:00 tiang sunglawi ngaiin tuah ding in timhtuahnak an ngei, tiah Lai Chiathat Bu (LCB) tuanvo ngeitu sin in thawng kan theih.

Yangon Lai Kumthar tuah nakding hmun Map/Mepung

Atutan Yagon THO puai ah Main Speaker ca ah Dr. Lian Hmung Sakhong sawm a si i, amah nih caan a pek khawh deuh lo a si ahcun CNF chung in upa pakhat khat nih caan an hman te lai.

Cun, Myanmar Vice President Henry Van Thio te chungkhar zong sawm an si i, Henry Van Thio pumpak aa tel khawh lo hmanh ah a chungkharle tal cu an rak kho lai tiah kan ruah, tiah LCB Chairman Pu Tial Ling nih a chim.

“Atutan cu Stage cung ah Laitlang chuak tisik-anhnah pawl tling tein an chiah chih hna lai. Lailam, Hlasak le Laipaih zong kan tuah lai. Cun, tukum chung ah Laimi chung in PhD a hmumi hna le taang-10 ah 3-D cung a hmumi pawl laksawng peknak a um lai. Myanmar ramhuap in alarmi Laimi hna laksawng peknak zong a um lai. Chuncaw ah Sabuti zong kan i dang hna lai,” tiah Pu Tial Ling nih a chim.

Yangon ah LCB  nih THO puai hi kumtin a tuah i atukum in cun a voi 14nk a si cang lai. Yangon khuachung ah a ummi vialte rak chuah khawh ding in sawm nan si dih.

Hi ni ah Special biachimnak le Laipaih pawl cu The Chin Journal nih kan Facebook Page ah Live in kan rak thlah te lai. Yangon Lai Kumthar (THO) ah a rak phan kho lomi ramchung le ramleng unau hna zong nih LIVE zoh in Yangon Lai Tho rak kan zawh ve te u, tiah kan i sawm hna.

Latest News