Yangon Lai Khual-Inn October 26 ah an On Cang Lai

| The Chin Journal | Hakha, Chin State

Yangon khua i All Chin Society (ACSY) hmun ah Lai Chiathat Bu (LCB) nih a sakmi Lai Khual-Inn cu atu thla chung ah onnak tuah a si cang lai, tiah LCB Secretary Pu Peng Hu nih a chim.

Hi Lai Khual-Inn hi LCB nih May thla khan a sakmi a si i, atu ah an hun lim cang caah October 26 ah onnak tuah ding in timhtuah a si.

Yangon ramthen, North Dagon, Ma Wa Ta hnulei ah an sakmi a si i, Hakha, Thantlang le Kalay hrawnghrang ah a ummi kanmah Laitlai hna ca ah tinh bikmi a si, tiah LCB Chairman Pu Tial Ling nih a chim.

“May 1 ah khan innkillung kan rak thlak i May 6 in sak hram kan rak thok. Atu October chung hin on ding in kan i tim. Abikin, kanmah Laitlai a simi Hakha, Thantlang le Kalay lei a ummi Laitlai hna, damlo ruang ah Yangon an rat tik i tlunnak ca ah kan timhtuahmi a si,” tiah LCB Chairman Pu Tial Ling nih a rak chim.

LCB sakmi Lai Khual-Inn hi dot-3 a si i, a cungbik dot ah meeting/Seminar tibabantuk tuah khawhnak minung 50-100 tlum Hall le riahnak khaan a fami pahnih an um lai. A cungbik Hall le khaan pahnih hi a man tlawmte lak in hlanh an si lai.

Cun alai dot ah hin Laitlai midamlo, Yangon a rak phanmi hna nih alak tein an riah khawhnak khaan pawl an um lai.

Cun, a tang bik dot ah hin Khual-Inn a hngaktu umnak, minung 50-100 tiang rawl ei khawhnak cabuai pawl hun a si lai i, khual hna nih amah tein rawl an i chumh khawhnak coka zong tuah a si lai.

Hi Lai Khual-Inn ah a rak phanmi Laitlai midamlo hna nih an liam dingmi cu ti man le mei man telawng hi an si lai.

Yangon sii-inn panh nakding kong ah midamlo hna nih lung vaivuan in an um lo nakhnga Khual-Inn ah Yangon khuachung i sii-zung le sii-khaan Information pawl tlamtling tein an tarpiak dih hna lai, tiah theih a si.

Latest News