Yangon Airport ah Ralhrang Kahdohnak a Um Kho an Ti Caah Checknak an Tuah

| The Chin Journal | Hakha, Chin State

Yangon International Airport ah ralhrang kahdohnak a chuak sual lai timi phannak a um caah Home Misnister hruainak in checknak an tuah, tiah theih a si.

Airport runvennak lei a chambau lo nakhnga le khualtlawng hna nih tihphannak um loin khual an tlawn khawh nakhnga riantuan ding in General Aung Ko nih Airport riantuantu pawl forhfialnak zong a ngeih hna.

Ralhrang pawl Myanmar ah luh ding in timhtuahnak an ngei tiah Malaysia palik nih thawng an thanh hnu ah atu bantuk in runvennak lei zohfelnak kan tuah hi a si, tiah Myanmar palik chimnak nawlngei Myo Thu Soe nih a chim.

“Myanmar ah ralhrang rat an tim tiah Malaysia palik nih thawngpang an chuahmi a um. Hi kong ah kan ram ca ah thinphannak cu a um ngai ko. Cun khualtlung luhchuahnak bik a simi Yangon Airport hi abiapi khun. Cucaah, runvennak lei zohfelnak kan tuah hi a si,” tiah Myo Thu Soe nih cun a chim.

May 14 ah khan Malaysia ah a ummi Myanmar Embassy telh in Buddhist biaknak sianginn pawl bomb puah a timtu ralhrang pali cu Malay palik nih an rak tlaih hna.

Cu ralhrang hna nih cun Myanmar ram zong ah kal in ralhrang kahdohnak tuah an tim, tiah Malaysia palik nih thawngpang an rak chuah.

-7Day News Journal

Latest News