Yangon ah Kum 4 Ngakchia Pa a Thattu Mandalay ah an Tlaih

| The Chin Journal | Hakha, Chin State

September 22 ah Yangon ramthen, North Okkalapah peng ah kum 4 telawng a si rihmi ngakchia pa a kuttem buin le a hnawng hri in tem buin a thattu pa cu September 24 ah Mandalay ah an tlaih, tiah theih a si.

September 22 chun ah khan North Okkalapa peng, Swe Pawhkan Industrial Zone sang ah a ummi kum 4 ngakchia pate nih thil a teih liomi a nu sin ah “Leng ah ka chuak ta lai ka nu” taih a ti i inn in a chuak.

Caan sau nawn a rauh tiang ngakchia pa inn a panh lo tik ah a nu nih a vung kawl.

An innpawng ah a ummi sehzung hnulei burbuk lak ah ngakchia pate cu a kut hnih in tem buin le a hnawng ah hri in tem buin a nunnak a rak liammi cu hringtu a nu nih a hmuh.

Ngakchia pa a thattu pa hi kum 25-30 karlak a simi Nay Win Aung tiah auhmi a si i, thah a tongmi ngakchia pa i a pa he sehzung pakhat ah riantuan ti an si.

Sehzung rian an tuannak ah ngakchia pa i a pa hi haotu a si i, mithattu Nay Win Aung hi a kuttang ah rian a tuanmi a si.

North Okkalapah pen uktu bu chungtel U Kyaw Zin nih, “Ngakchia pa i a pa le Nay Win Aung hi rian an tuannak ah an rak i si bal an ti. Cu ruang ah cun Nay Win Aung nih lungfah in kum 4 a simi a fapate hi lehrualchamnak ah a thahpiakmi a si kho,” tiah a chim.

Nay Win Aung cu palik nih an tlaih cang i mithah lainawn sualtuahnak pohma 302 in case an on, tiah theih a si.

-Eleven Media

Latest News