Wirathu Nih Ma Ha Na Cawnpiak a Ngaih Lo Cun Tazacuai Chap Lai

| The Chin Journal | Hakha, Chin State

Yangon ramthen Sangha Maha Nayaka (Ma Ha Na) phungki bu i cawnpiaknak U Wirathu nih a ngaih lo a si ahcun phungki he aa pehtlaimi pohma pakhat in taza kan cuai chap lai, tiah biaknak le nunphung lei vuanci zung nih June 3 ah cathanh a chuah.

Ma Ha Na nih U Wirathu cu May 29 ah auh i cawnpiaknak ngeih an rak timh nain a nicaan an thawn than.

Atulio a umnak theih a si lomi U Wirathu zong nih “Ma Ha Na” cawnpiaknak ka ngaih dih in palik sin ah kaa ap lai tiah a chim ve than.

Tazacuai a rak ton hlan deuh ah khan “Tazacuainak raltha tein ka in lai, rak ka tlai ko hna seh,” tiah a chim nain tlaih taktak an timh tikah a tlau diam.

U Wirathu cu Western Yangon District Administration zung uktu chang a simi U San Min nih pohma 124 (a) in taza a cuai.

Myanmar cozah kha mipi nih an huat nakhnga le buaibainak chuahpi ding in U Wirathu nih tuksawhnak bia a chim zungzal ruang ah atu bantuk in tazacuai a ton hi a si.

Western Yangon District Court nih U Wirathu tlaih ding in May 29 zaan ah nawl a chuah.

Cu caan thawk cun Yangon palik le Mandalay palik nih U Wirathu cu tlaih ding in an kawl. Mandalay i a umnak Ma Soe Ying phungki sianginn zong ah an vung kal hnawh nain a um lo.

Yangon khuachung zong ah an kawl len. Atu zong ah Mandalay khuachung ah an kawl len. Asinain, a phone zong a thah i a umnak theih a si ti lo.

U Wirathu taza an cuainak pohma 124 (a) ning ah “Acozah kha mipi nih an huat nakhnga, an upat lo nakhnga mipi sin ah forhfialnak a tuahtu cu tangka dantatnak le nunchung thong dantatnak pek khawh an si lai,” tiah aa tial.

Kan hnu April 29 ah khan Taningtharyi ramthen, Meik khua ah U Wirathu nih biachimnak a rak ngei i cu lio ah cun minung tam taktak nih a biachim an rak ngai.

Cu biachimnak ah cun U Wirathu nih, “Mah hlan kan ram uktu pawl nih cun leichungchuak thilri lawng an fir; asinain, atu a kan uktu hna nih cun rammipi kaa an purh i an fir. Mipi nih harlefe ngaiin an i kawlhawl sekmi cu uktu lei nih ngunkhuai an ti an hal hna, budget zong uak deuh in hal a si rih, an zapi in mifir lawngte an si ko. Fir sawhsawh hmanh a si lo; a purh bak in an purh,” tiah a rak chim.

Cu lawng si loin May 5 ah Yangon City Hall hmaika ah tuahmi baichimnak ah, “Hluttaw chung ah a thumi ralkap MP pawl khi rammi nih pathian bantuk in kan biak hna awk a si,” tiah U Wirathu nih a rak chim rih.

A cunglei bia a chimmi pawl nih Myanmar rampi a tlerh i Kawl phun tanhtu mibu tawsawh in buaibainak chuahter a timh, tiah mi tampi an hmuh.

Myanmar President zung biachimtu U Zaw Htay nih, “U Wirathu kong he pehtlai in rampi buaibainak tiang a chuah a si ahcun a herh ning paoh in dantatnak kan tuah lai,” tiah May 31 ah a chim.

Latest News