Wirathu Cu Palik Lawng Si Loin a Hmutu Paoh Nih Tlaih Khawh

| The Chin Journal | Hakha, Chin State

Myanmar cozah minchiat ding in le rammpi nih huat ding in bia a chimtu phungki U Wirathu cu biaceih zung nih tlaih ding in nawl a chuah cang caah palik lawng si loin rammpi a hmutu paoh nih tlaih khawh a si, tiah upadi lei ruahnak petu sihni U Khin Maung Myint nih a chim.

“Tlaih ding in nawl chuah a si hnu ah palik lawng nih tlaih khawh a si tiah kan rauh theo tawn. Angai ti ahcun mipi lei nih thawngpang pek khawh zong a si i, thawngpang pek lawng in a zat lo caan, palik an rak phak rih lo i tlaih awk a simi pa kha a zaam thai ding dirhmun a si ahcun rammpi zong nih cu pa/nu cu tlaih khawh a si,” tiah U Khin Maung Myint nih a chim.

Wirathu cu pohma 124 (a) in tazacuai a si hnu ah Western Yangon District Court nih tlaih ding in May 29 zaan ah nawl a chuah.

“Tlaih ding in biaceih zung nih nawlpeknak ca cu kan sin ah a phan cang. Asinain, zeiti phun in dah kan tlaih lai timi ningcang theihfian a si rih lo,” taih Western Yangon District palik bawi nih a chim.

Cucaah, Wirathu cu atu tiang tlaih a si rih lo. “Keimah tlaih ding in nawlpeknak ca an chuah cang ti ka theih. Yangon ah ka um ko. Rak ka tlaih ko hna seh. Raltha tein biaceih zung ah ka dir lai,” tiah U Wirathu nih a hun chim ve.

Myanmar cozah kha mipi nih an huat nakhnga le zei ah an rel lo nakhnga U Wirathu nih bia a chim tiin Western Yangon District Administration zung uktu chang a simi U San Min nih taza a cuai hi a si.

U Wirathu taza an cuainak pohma 124 (a) ning ah “Acozah kha mipi nih an huat nakhnga, an upat lo nakhnga mipi sin ah forhfialnak a tuahtu cu tangka dantatnak le nunchung thong dantatnak pek khawh an si lai,” tiah aa tial.

Kan hnu April 29 ah khan Taningtharyi ramthen, Meik khua ah U Wirathu nih biachimnak a rak ngei i cu lio ah cun minung tam taktak nih a biachim an rak ngai.

Cu biachimnak ah cun U Wirathu nih, “Mah hlan kan ram uktu pawl nih cun leichungchuak thilri lawng an fir; asinain, atu a kan uktu hna nih cun rammipi kaa an purh i an fir. Mipi nih harlefe ngaiin an i kawlhawl sekmi cu uktu lei nih ngunkhuai an ti an hal hna, budget zong uak deuh in hal a si rih, an zapi in mifir lawngte an si ko. Fir sawhsawh hmanh a si lo; a purh bak in an purh,” tiah a rak chim.

Cu lawng si loin May 5 ah Yangon City Hall hmaika ah tuahmi baichimnak ah, “Hluttaw chung ah a thumi ralkap MP pawl khi rammi nih pathian bantuk in kan biak hna awk a si,” tiah U Wirathu nih a rak chim rih.

A cunglei bia a chimmi pawl nih Myanmar rampi a tlerh i Kawl phun tanhtu mibu tawsawh in buaibainak chuahter a timh, tiah mi tampi an hmuh.

-7Day News Journal, MCN

Latest News