Win Le Zaw Kong Myanmar Cozah Nih a Tha Bik in Tawlrel Timh

| The Chin Journal | Hakha, Chin State

Thailand ram ah thihdan aa huahmi Myanmar rammi pahnih Win le Zaw kong he pehtlai in Myanmar cozah lei nih a tha bik in kan tawlrel lai, tiah September 13 zanlei ah Myanmar President zung chimnak nawlngei U Zaw Htay nih a chim.

“Hi kong ah hin abiana ah cathanh te hei chuah, nawlpatnak hei tuah menmen in a tlamtling kho ding a si lo. Hi case hi Thailand biaceih zung a dotdot in phakpi a si hnu ah High Court tiang nih thihdan a pekmi a si. Acozah lei in a tha bik cun kan i zuam ve lai. Zeitindah hmual ngei tein kan tawlrel lai timi khua kan khaan lio a si,” tiah Media pawl sin ah a chim.

Win le Zaw thihdan an pekmi hna dindonhter ding in nawlpatnak tuah than awk ah Thailand ah a ummi Myanmar Embassy le Thailand ram sihni bu zong an i zuam cuahmah ve.

Win le Zaw tiah a tawinak in auhmi Ko Win Zaw Tun le Ko Zaw Lin cu aluancia September 2014 ah Thailand ram, Koh Tao tikulh ah British nungak tlangval an thah hna timi sualphawtnak in December 2015 ah thihdan pek an rak si.

August 29, 2019 ah Thai Supreme Court nih thihdan thotho a pek hna caah Thai siangpahrang sin lawng ah nawlnak tuah khawh a si i, ni 60 chung ah nawlnak tuah ding in timhtuahnak an ngei.

-Sandaw Ching

Latest News