Win Le Zaw Kong ah Myanmar Hacker Bu Nih Thai Cozah Website Pawl an Hack

| The Chin Journal | Hakha, Chin State

Thai baiceih zung sang bik (Supreme Court) nih Win le Zaw thihdan a pekmi hna a let lo caah lehrulchamnak ah Myanmar Hacker bu “UGMH” nih Thai cozah zung pawl i an website pawl an hack hna, tiah theih a si.

Hi Myanmar hacker bu hi “Union of Underground Myanmar Hackers” (UGMH) tiah min an i pe i Rohingya buaibainak a rak chuah lio zong ah khan Turkey cozah website pawl an rak hack len cang.

Win le Zaw thihdan i huah thotho ding in Thai biaceih zung nih bia a chah hnu ah UGMH nih “Operation Thailand 2019” tiah min an bunh i cozah website le a dang Thai website pahra leng an hack.

UGMH bu nih Thai website an hackmi cu mahti hin an cuang i Myanmar ramhla aa chuah

Cu an hackmi chung ah cun Thai cozah sizung pakhat website le Kapang palik zung website pakhat zong an i tel.

An hack khawhmi website pawl cu hun kau tik ah anmah UGMH Logo le Win le Zaw thihdan nan pek hna ruang ah kan in hack hna timi theihternak ca an tial pin Myanmar ramhla “Kabya Makye” music a chuak.

Thailand Supreme Court nih August 29 ah Win le Zaw cu thihdan thotho pek ding in biachahnak a tuah.

August 21, 2017 ah khan cahmai 318 a chahmi cathluan in nawlnak an rak ap i kum 2 a rauh hnu ah thihdan in luat lo ding in biachahnak an tuah hi a si.

Win le Zaw tiah a tawinak in auhmi Ko Win Zaw Tun le Ko Zaw Lin cu aluancia ွSeptember 2014 ah Thailand ram, Koh Tao tikulh ah British nungak tlangval an thah hna timi sualphawtnak in December 2015 ah thihdan pek an rak si.

Atu ah cun Thai Supreme Court hmanh nih thihdan thotho a pek hna caah Thai siangpahrang sin lawng ah nawlnak tuah khawh a si i, ni 60 chung ah nawlnak tuah ding in timhtuahnak an ngei.

Latest News