VP Henry Van Thio “World Leader of Tourism and Development Award” an Pek

| The Chin Journal | Hakha, Chin State

Romania ram ah hram a bunhmi European Council on Tourism and Trade tiah min aa pemi bu pakhat nih Myanmar Vice President Henry Van Thio cu “World Leader of Tourism and Development” timi laksawng kan pek, tiah thawng an thanh.

A cunglei laksawng hi vawleicung khualtlawnnak lei rian ah Vice President Henry Van Thio nih thanchonak a chuahpi tiin upatnak caah European Council min hmang in an pekmi a si.

Vice President Henry Van Thio cu “Khualtlawnnak Rian le Thanchonak Rian lei ah Vawleicung Hruaitu” tiin laksawng an pek bang in European Tourism Academy chungtel zong ah telh chih a si.

Myanmar ramchung khualtlawn thanchonnak Central Committee ah Vice President Van Thio cu Chairman a si bang in amah tlangtlaknak tang ah Myanmar nih khualtlawnnak (Tourism) rian lei in thanchonak nganpi a hmu tiin upatnak laksawng pek ding in an thim hi a si.

2017 ah khan Cambodia Prime Minister Hung Sen zong European Council on Tourism and Trade nih “Global Ambassador for Tourism and Sustainable Development Goals” timi laksawng an rak pek bal cang.

“World Leader of Tourism and Development” laksawng Vice President Henry Van Thio an peknak kong cu August 29 ah thanh a si i, laksawng peknak puai cu aralaimi September 27, 2019 ah Naypyidaw ah tuah a si lai, tiah European Council on Tourism and Trade nih thawng a thanh.

Asinain, US ah hram a bunhmi Pacific Forum ah Myanmar ramkhel hlathlaitu a rak tuan bal i atu England ram Oxford ah PhD a tuah liomi Nay Yan Oo nih cun, “ECTT timi hi European Union tang ah a ummi phungning bu a si ngaingai le a si ngaingai lo a fiang lo. Adeu zong a si kho. ECTT hi bu deu hna a si i, Vice President nih laksawng hi a lak a si ahcun kan limhaang tu a zor kho,” tiah a langhter.

Latest News