VP Henry Van Thio nih Paletwa Ralzam Ca ah Facang Tun 200 a Kuat

| The Chin Journal | Hakha, Chin State

Myanmar Vice President Henry Van Thio nih Paletwa ralzam hna ca ah facang tun 200 a kuat, tiah thawng kan theih.

Vice President nih a kuatmi facang cu April 11 ah khan Sami ralzam camp ah an phan dih cang, tiah ralzam bawmh awk ah a kalmi minung pakhat nih The Chin Journal ah a chim.

“Vice President nih facang tun 200 ralzam ca ah a kuatmi hi ahmaanmi a si. Asinain, a thlithup deuh in tawlrel a si i, minung tam nih an thei lo. Facang pawl cu Zarhte Ni ah khan Sami ah an phan cang. Asinain, Paletwa lei ah an lanhpi kho rih lo,” tiah a chim.

Ralzam 3,000 leng an umnak Paletwa ah facang kuat kong he pehtlai in Chin ramkulh sipin vuanci tthing Salai Isaac Khen nih “Chin mino hna le zatlangbu nih ni 2, ni 3 chung kan i zuam len nain a tlam a tlin lo caah kan ngol chung…” tiah a chim.

Cun, Amyotha Hluttaw MP Salai Myo Hteik nih, “Facang tun 50 hrawng a phormi motor cu a kal ko. Lampi ah motor a rawk i khua pakhat ah aa din. Pehzul in facang kuat khawh ding in kan i zuam ko lai. Abikin, a kal ding motor le a mongtu an har ca ah a si,” tiah The Chin Journal ah a chim.

Sami ralzam camp ah a phanmi upa pakhat nih, “Kawl ralkap nih lamtanttim tiang lawng kan i thlah khawh hna lai a kan ti i, Paletwa tiang cu an kal ngam lo,” tiah a chim ve.

Paletwa lei ah motor tlamtling in a lanh khawh a si ahcun Vice President kuatmi facang hi a rauh hlan ah Paletwa khuami hna sin ah an phakter ko lai.

Latest News

News in Burmese