Vom Sehnak in Pa Pakhat a Nunnak a Liam

| The Chin Journal | Hakha, Chin State

Rakhine ram, Yatehtaung pengkulh Thi-sway khuate ah kum 23 tlangval pa pakhat vom nih a seh i a nunnak a liam.

Thi-sway khuachung nitlaklei cerhtual ah khoika in a rami si ti hngalh lomi vom pakhat a rak phan. Mino 20 hrawng nih vom cu an va dawi. Ramlak hmun pakhat an phanh ah kum 23 tlangval Phyo Thi Che cu vom nih a zuan hnawh i a hrom ah a seh, minutes 20 hrawng a luan hnu ah a nunnak a liam.

“Kan khua kiangkap ah hin tlang le ramlak zong a um lo. Nitlaklei ah Da-ni thinghual a um, hi bantuk in tupi le tlangsang a um lonak hmun ah vom hi zeitindah a rak phak ning si hnga. Khua mino pawl nih an dawi cuahmah lio ah vom nih cun a rak seh hna tiah an chim. Hi thil a can hi tuzing suimilam 10:00 hranwg ah a si” tiah khuami U Than Aung Htun nih a chim.

Vom a hmet/ngan hi cawfa tia hrawng a si. Ramlak ah bomb/meithal kahdohnak a chuah pah tawn ruang ah tih lung in nelrawn ah a rak zaam hi a si kho tiah Thi-sway khua siang cachim saya pakhat nih a chim.

-Narinjara

Latest News