US Ralkap Nih Osama Bin Laden Fapa Kan Thah Cang, Tiah President Trump Nih a Fehter

| The Chin Journal | Hakha, Chin State

Al-Qaeda ralhrang a rak hruaitu Osama Bin Laden fapa cu US ralkap kahdohnak in a nunnak a liam cang, tiah US President Donald Trump nih nihin ah a fehter.

Afghanistan le Pakistan ramri ah tuahmi US ralkap kahdohnak ah Bin Laden fapa Hamza cu thah a si tiah July thla ah thawngpang a rak chuak.

Asinain, July thla i thawngpang kha US cozah lei nih fehternak ngaingai an rak tuah kho lo. Atu ah President Trump pumpak nih Hamza a thihnak kong fehternak a hun tuah hi a si.

Nihin ah President Trump zung in Journalists pawl sin ah ca an kuat hna i “Al-Qaeda ralhrang bu ah luban pakhat a si i, Osama Bin Laden fapa zong a simi Hamza Bin Laden cu Afghanistan/Pakistan hmunram ah tuahmi US ralhrang dohkalhnak Operation ah thah a si cang,” tiah an fehter.

“Hamza thihnak nih Al-Qaeda ralhrang hruainak lei ah chambaunak a chuahpi lawng si loin hi hnu ralhrang kahdohnak tuah ding in timhtuahnak an ngeimi pawl zong ah harnak a pek hna lai,” tiah US President zung thawngthanhmi ah aa tel chih.

-NBC News, RT

Latest News