/

US President Thimnak ah Vote Ningcang Loin Thlaknak a Um Lo tiah FEC nih a Fehter

The Chin Journal | Hakha | Chin State
US ramchung khuapi tampi ah atutan US President thimnak kong he pehtlai in lamzawhnak a chuak/Photo-AP

Atulio US President Donald Trump le Democrat in Joe Biden karlak US President tthudan cuhnak ah US rammi hna nih vote ningcang loin an thlak timi tehte fekfuan a um lo, tiah US Federal Election Commission (FEC) nih a fehter.

President Trump nih, “Phungning loin le ningcang loin thlakmi vote pawl an um len,” tiah Twitter ah ca tam ngai a tar.

FEC Commissioner Ellen Weintraub nih, “Atutan US thimnak ah hin chim awltak ngaingai a simi tlamtling lonak a um lo. Vote thlatu lei nih phungning loin le ningcang loin vote an thlak timi tehte zong a um lo. Hiti ka chim tik ah a zumh zong nan ka zum lo kho ko. Asinain, kan theih dih awk cu US ramchung i zei bantuk ramkhel party he hmanh aa pehtlai lomi thiamsang pawl nih hi thimnak hi an tawlrelmi a si,” tiah a chim.

Vote ningcang loin thlaknak tehte ngaingai atu tiang ah hmuh a si lo nain Michigan ramkulh Antrim County ah cun vote relnak software ah rawhralnak a um ruang ah palhnak a um, tiah Michigan Secretary of State Jocelyn Benson nih a chim.

Software ah palhnak a um ruang ah tuan deuh ah khan Antrim County ah Biden nih Trump cu vote 3,000 hrawng in a tei.

Asinain, vote an rel tthan tik ah Trump nih vote 2,500 hrawng in a rak teimi an hmuh tthan i, “Antrim County ah Trump nih Biden a tei” tiah an fehter tthan.

Michigan ramkulh chung i vote relnak hmun 40 leng ah a cunglei software hi an hman cio caah ttha tein zohfelnak tuah le vote relnak tuah tthan ding in Michigan Republican Party nih halnak zong an tuah.

Electorial vote 16 a umnak Michigan ah Biden nih Trump cu vote 150,000 hrawng in a tei.

Atu tiang ah vote official in an thanh rih lomi State paruk an taang rih–Nevada, Arizona, Pennsylvania, Georgia, North Caroliana le Alaska an si.

Asinain, abikin an i zuamnak hmun (Battleground States/Swing States) pathum (Nevada, Arizona le Georgia ah Biden nih a hun lonh chin thluahmah cang caah Trump ca ah ruahchannak a tlawm ngaingai cang.

Trump nih a tei hrim lai tiah an zumhnak Pennsylvania (EV-20) zong ah Biden nih Trump cu vote 2,500 hrawng in a lonh cang.

“Atu tiang ah US President Thimnak ah Teitu Official in Thanh a um rih lo.” Catlang hi hmet law Result Zoh: 2020 US PRESIDENTIAL ELECTION RESULT – CNN

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19