, /

US President Biden nih Myanmar Ralbawi Pawl Dantatnak Thawng a Thanh

The Chin Journal | Hakha | Chin State

US President Joe Biden nih Myanmar ram nawlngeihnak a latu Myanmar ralbawi pawl dantatnak thawngthanhnak a tuah cang, tiah theih a si.

Hi dantatnak hi a nung colh dingmi a si i, nawlngeihnak a latu Myanmar ralbawi pawl pin ah anmah he aa naihniammi chungkhar pawl zong dantat chih dih an si.

“Myanmar ram nawlngeihnak a latu ralbawi pawl a rianrannak in dantat khawh nakding Executive Oder thar nihin ah ka fehter. Nawlngeihnak laknak ah aa telmi Myanmar ralbawi pawl le an chungkhar vialte a rianrannak in le hmual ngei ngaiin dantat colh an si lai,” tiah President Biden nih a chim.

“A voi khatnak bik karhlannak ca ah zei bantuk dantatnak dah kan i tinh lai timi tutan zarh chung ah kan zohfel lai. Cun, Myanmar ram lei kuatmi US thilri (Exports) kong zong ah faak ngaiin dantatnak kan tuah lai,” tiah a chim chap.

“US he aa pehtlaimi rianttuannak, Myanmar ralkap ca ah hlawknak a petu pawl kan phih dih lai. Asinain, Myanmar ramchung i ngandamnak, zatlangbu cawlcanghnak le Myanmar rammi hna ca ah direct in hlawknak a petu rian/bawmhnak pawl cu pehzul in kan dirkamh lai,” tiah pehzul in a chim.

Cun a donghnak bik ah, “Democracy cawlcanghnak a linhsat lio ah lamzawhtu hna cung ah hranhramnak (Violence) hmang in lehrulnak an tuahmi hi a zeitilei hmanh in cohlan awk a ttha lo. Vawleipi nih Myanmar ram kan cuanh ko. A herh ahcun dantatnak chap tthan ding in ready kan si. Vawleicung kan hawile ram hna he ttuan tti in Myanmar ram kong hi pehzul in kan tawlrel lai,” tiah a chim.

Myanmar ralbawi pawl cung in dantatnak an pek dingmi hna hi dikthlir in langhter a si rih lo caah aho ralbawite khi dah/zei bantuk dantatnak dah pek an si timi theih fian a si rih lo.

Cherhchan: Fox News

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.