US Nu nih Dawr Chung Eidin Mehmoi Vailte a Khuh Hnawh Hram Dih Caah an Hlonh Dih

| The Chin Journal | Hakha, Chin State

US ram, Pennsylvania i dawr pakhat ah eidin le mehmoi an zuarmi vialte cu minu nih hramhram in a khuh a khuh hnawh dih caah $35,000 man tirawl an hlonh dih, tiah theih a si.

Hanover Township ah a ummi Gerrity’s Supermarket ah minu cu a lut i, chungkhar nih nitin eidin le mehmoih pawl an cawk tawnnak dawr fa nawn pakhat chung ah a vung lut.

Cun, hrawl ah an chiahmi sa le anhringso pawl cu azapi in pakhat hnu pakhat in a khuh a khuh hnawh hramhram hna.

Dawr chung rianttuantu pawl nih arianrannak in an zuan hnawh i an tthawl. Palik sin ah report an tuah i minu cu Hanover Township palik nih suimilam tlawmpal a rauh an tlaih khawh.

Hitihin dawrthil vialte a khuh a khuh hnawh hramhramtu nu hi COVID-19 zawtnak a ngeih le ngeih lo theih a si rih lo.

A khuh a khuh hnawh dihmi tilrawl pawl an hlonh dih lawng si loin dawr chung zong thianhlimhnak a thar in ttha tein an tuah i zawtnak rungrul thahnak sii zong an kah viar.

Atulio US ramchung ah COVID-19 zawtnak a ngeimi an hun karh chin thluahmah i, minung 85,000 leng zawtnak an i chawn cang.

Cu chung ah cun minung 1,800 hrawng nih damnak an hmu tthan i atu thawngpang kan ttial lio caan tiang ah hin minung 1,295 an thi cang.

Ref: CNN

Latest News

News in Burmese