US nih ISIS Ralhrang Bawizik Thar Konglam Hlathlainak a Tuah Cuahmah

| The Chin Journal | Hakha, Chin State

US Delta Force ralkap nih October 26 ah Syria ram nitlak-chaklei Barisha khuate pawng ah ISIS ralhrang bawizik Abu Bakr al-Baghdadi an thah dih hnu ni tlawmpal ah Baghdadi rian a chawngtu ding ISIS bawizik thar an thimmi kong cu Audio Tape hmang in ISIS nih thawng an thanh colh ve.

October 31 ah ISIS nih Audio Tape an chuah i, Baghdadi a thi cang timi an fehter hnu ah Baghdadi rian a chawngtu ding caah Abu Ibrahim al-Hashemi al-Quraishi kan thim, tiah thawng an thanh.

President Donald Trump nih, “ISIS ralhrang nih hruaitu thar an thimmi kong kan theih tuk ko. An thimmi pa hi aho a si timi zong kan theihmi a si ko,” tiah a chim.

A ngaingai ah ISIS nih an bawizik ah an thim tharmi Hashemi hi ahodah a si timi fiang ngaingai in theih a har.

“ISIS ralhrang bawizik thar Hashemi kong hi fiang ngaingai in theihmi kan ngei lo. ISIS biaceihtu bu ah luban lei a rak ttuanmi a si i, Sharia Committee hruaitu pakhat zong a si timi tiang lawng kan theih,” tiah Iraq ralhrang dohkalhtu bu ah tuanvo ngeitu pakhat a simi Hisham nih a chim.

US ralhrang dohkalhtu bu i Coordinator Nathan Sales nih, “Ralhrang bu ah hruaitu thar an i thim caan paoh ah an thimmi hruaitu konglam hi fiangfai tein hlathlainak kan tuah zungzal,” tiah a chim ve.

Baghdadi a thih hnu October 31 ah ISIS nih an chuahmi Audio Tape ah ISIS ralhrang biachimtu nih, “US cung ah lehrulchamnak kan tuah lai,” tiah tlerhkhawnnak bia zong a chim chap.

2014 in 2017 karlak ah Syria le Iraq ah ttihnung in thahnawnnak a tuah i vawleicung hmun kip ah ralhrang bomb puahnak le tuksaphur thahnawnnak a rak tuahtu ISIS ralhrang bu cu US hruaimi ttangrual ralkap bu nih an tei hna hnu ah penmi hmunram rep ngei ti loin aa tthentthek in an um hna.

Sihmanhsehlaw, ralhrang kong ah thiamsang a simi pawl nih, “ISIS hi vawleipi ca ah ttih a nung ngaimi ralhrang bu a si peng rih ko. Syria le Iraq ah sung cang hmanhselaw vawleicung hmun kip ah an i pharh i pehtlaihnak ttha tuk in an ngei. ISIS ralhrang a rak ttuanmi pawl kha ram thumnak an ram ah an kir tthan hna i an umnak ram ca ah ttihnung ngaingai an si. Cun, atu ah cun ISIS hi Africa vawleitthen, Somalia le Asia nichuahlei ah a ummi ralhrang bu pawl he pehtlaihnak an ngei thluahmah. Ram kip ah an i pharh caah vawleipi ca ah ttihnung peng an si rih,” tiah an chim.

Nathan Sales nih, “ISIS ralhrang bawizik Baghdadi kan thah khawh cang nain ISIS tlerhkhawnnak hi a dihdong rih lo. US rampi a humhim nakding ca ah ISIS ralhrang dohkalh hi abiapi tukmi rian ah kan chiah peng rih ko,” tiah a chim.

A nung in siseh, a thi in siseh vawleipi nih tlaih le thah a duh bikmi ISIS ralhrang bawizik Baghdadi cu US Delta Force ralkap 70 nih October 26 zaan ah an luh hnawh i amah tein nunpek bomb aa puah.

US President tthing Barack Obama chan ah al-Qaeda ralhrang bawizik Osama Bin Laden an rak thah i a ruak rili chung ah kan hlonh an ti bantuk in Baghdadi ruak zong rili chung ah kan hlonh, tiah US nih thawngthanhnak a tuah.

RelchapUS Delta Froce Ralkap (70) nih ISIS Bawizik an Luh Hnawh Ningcang 

-Reuters, ABC News

Latest News