US nih Iran Ralbawi a Thah Hlan ah a Cangmi US-Iran Karlak Entainak

| The Chin Journal | Hakha, Chin State

Iran cu Middle East hmunram ah a ummi Arab ram (Muslim ram) vialte lak ah ralhriam lei in a tthawng bikmi le ralhriam sernak lei ah fimthiamnak sang bik a ngeimi ram a si.

Careltu Fianhnak: Middle East Hmunram (Middle East Region) timi cu Iran, Iraq, Israel, Saudi Arabia, Turkey, Syria, Egypt, UAE, Lebanon, Qatar, Kuwait, Jordan, Palestine, Yemen, Bahrain, Oman, Cyprus timi ram pawl an umnak hmunram zapi khi a huap in Middle East (Vawlei Nichuah-Laifang) tiah auh a si.

Iran Nuclear Hnatlaknak in US a Chuak

US President tthing Barack Obama chan ah Iran nuclear hnatlaknak an rak tuah khawh i, Iran cung sipuazi phihkhamhnak an dindorh bang in US-Iran karlak pehtlaihnak a rak ttha deuh ngaingai.

Iran Nuclear Hnatlaknak cu vawleicung ramtthawngttha bikbik a simi United States, United Kingdom, Russia, France, China, Germany le Iran karlak ah April 2015 ah an rak tuahmi hnatlaknak a si.

Sihmanhsehlaw, President Donald Trump a hun kai hnu May 2018 ah “Iran nih nuclear ralhriam hnatlaknak kan ngeihmi a upat lo, ralhriam serchuah ding in hneksaknak a tuah peng ko,” tiah US nih a ti caah Obama chan i tuahmi Iran nuclear hnatlaknak in US a chuak.

Iran cung ah sipuazi dantatnak US nih fak piin a tuah tthan i, cu caan thawk cun US-Iran karlak entainak a hun i sem tthan.

Iran nih Nuclear Ralhriam Sernak ah Uranium a Serchuah Than

US nih Iran Nuclear Hnatlak in a chuah hnu le Iran cung ah sipuazi dantatnak a tuah tthan hnu ah Iran nih Nuclear bomb sernak ah an hmanmi Uranium serchuah hram a thawk tthan ve i, ballistic missile hneksaknak pawl zong a hun tuah.

Norway le Saudi Arabia Tilawng Pali Puah an Tong

US le Iran karlak entainak a linhsat cingling ah UAE ram lei ah a panhmi Norway le Saudi Arabia thilphortu tilawng pali cu Gulf of Oman timi rili cung ah May 12, 2019 ah bomb in puah an tong.

US le France nih hlathlainak an tuah tik ah Norway le Saudi Arabia tilawng pali bomb in  puah kong ah ttuanvo ngeitu bik cu Iran hi a si, tiah sual an phawt.

Japan le Norway Zinan Phortu Tilawng Pahnih Puah an Tong Than

June 13, 2019 ah Gulf of Oman lei kalnak rili cung ah Japan le Norway ram ah license tuahmi zinak phortu tilawng pahnih bomb in puah an tong tthan.

Mah tilawng pahnih bomb in puah kong zong ah Iran hi direct bak in pehtlaihnak a ngei, tiah US nih a puh tthan.

Saudi Arabia le UK zong nih US nih a chim bang in Iran hi ttuanvo ngeitu bik a si, tiah an puh ve.

Iran nih US Drone Vanlawng a Kah

June 20, 2019 ah Persian Gulf le Oman Gulf karlak rili cung ah a zuangmi US drone vanlawng cu Iran nih tla lak in a kahpiak.

Iran nih, “Kanmah Van hmun ah a zuan caah kan kah,” tiah a chim i US nih cun, “International Airspace ah kan zuang ko,” tiah a ti ve.

Saudi Arabia Zinan Sehzung Kah a Tong

September 14, 2019 ah Saudi Arabia ram i, vawleicung zinan sehzung ngan bik pahnih cu Drone vanlawng in kah an tong.

Yemen ram ah hram a bunhmi Houthi hriamtlai nih kanmah nih kan kah an ti nain Saudi Arabia le US nih Iran an puh. Aruang cu Houthi hriamtlai hi Iran he pehtlaihnak a ngeimi a si.

Iraq Ram US K1 Military Base Rocket Bomb in Kah a Tonnak

December 27, 2019 ah Iraq ram, Kirkuk khua pawng i US ralkap hmunkhuarnak K1 Military Base cu rocket in an rak kah i American Contractor pakhat a thih pin ah hliamhma a pumi an um len.

Rocket bomb in K1 Military Base a kaptu hi Iran he pehtlaihnak a ngeimi hriamtlai pawl an si, tiah US nih sual a phawt i, Iran cung ah lehrulnak kan tuan ve lai, tiah U.S. Secretary of State Mike Pompeo nih a rak chim.

US nih Iran a Lehrul

Iraq ram US ralkap hmunkhuarnak K1 Military Base kah a tonmi kong le US contractor a thihmi kong ah US nih December 29, 2019 ah lehrulnak a tuah colh ve.

Iran nih ralhrim le chawva lei zong in bawmhnak a pekmi Shia Muslim ralkap bu “Kata’ib Hezbollah” hmunkhuarnak cu December 29 ah US nih vanlawng in a den ciammam i Hezbollah ralkap 25 an thih pin ah minung 50 leng hliamhma an pu.

Kata’ib Hezbollah ralkap bu hi Shia Muslim pawl fonh in Iraq ram ah an dirhmi a si i, ISIS ralhrang rak doh lio 2014 ah an rak sermi Popular Mobilization Force timi ralkap bu he ttuan tti zong an si.

Iraq Ram Green Zone i US Embassy Doh a Tonnak

US nih Kata’ib Hezbollah hmunkhuarnak vanlawng in a den hnu ah Hezbollah ralkap a dirkamhtu hna le anmah Hezbollah ralkap chungtel pawl nih Iraq ram Green Zone ah a ummi US Embassy cu an vung kal hnawh i lungtum le mei tibantuk pawl nih US Embassy innpi cu an cheh len.

Hi US Embassy hi Iraq ram Baghdad khua i International Zone or Green Zone timi hmunhma chung ah a ummi a si i, Iraq ralkap nih runvennak zong ttha tein an tuahmi a si.

Asinain, US Embassy hrawh ding in le US pawl tthawldawi ding in a rak rami mipi cu runvennak a latu pawl nih an kham hna lo i hauhruang ttha tein kulh dihmi US Embassy lenglei tual tiang an phan.

Suimilam panga chung hrawng US Embassy cu lenglei in doh a tong i Embassy chung ah a ummi rianttuantu pawl nunhimnak ca zong ah ttih a nung ngaingai. Suimilam panga hnu ah Iraq nih ralkap 30 a thlah hna i runvennak a lakpiak tthan hna.

Puanzar Phen ah a Ummi Iran le Major General Qasem Soleimani Thihnak

A cunglei thil sining vialte hi Iran ramchung ah a cangmi an si lo nain puanzar phen in ttuanvo a ngeitu bik cu Iran a si, tiah US nih fek tein a zumh.

Hi kong ah Iran ramleng ral lei cawlcanghnak ttuanvo a latu Quds Force ralkap bu hi chaaktlaitu bik a si, tiah theih a si fawn.

Quds Force cu Iran rampi runvengtu ralkap Islamic Revolutionary Guard Corps (IRGC) i ralkap bu pakhat a si i, Iraq, Syria le Lebanon ram ah a ummi Hezbollah hriamtlai he pehtlaihnak thukpi a ngeimi an si.

Quds Force a hruaitu an luzik cu Major General Qasem Soleimani hi a si. Middile East chung US le US he pehtlaihnak a ngeimi ram hna i rianttuannak pawl hrawhral le hnahnawhnak a pe tawntu an luzik cu Major General Qasem Soleimani hi a si, tiah zapi nih theih a si.

US President thing Bush le Obama chan ah Major General Qasem Soleimani hi thah ding in khua an rak khaan bal nain Middle East ah buaibainak fak tuk in a chuak lai ti an phan ruang ah an kut an rak zo ngam lo.

Sihmanhsehlaw, atu President Donald Trump chan a hun phak tik ah amah pumpak nawl peknak in January 3, 2020 ah Iraq ram ah Major General Qasem Soleimani cu US nih a hun thah taktak hi a si.

Middle Ramkhel lei Thiamsang Ruahnak

“Atu bantuk in Iran nih Quds Force hmang in Middle East ah US rianttuannak pawl hrawhral le hnahnawhnak a peknak aruang cu Middle East ah Iran nih US he Power Balance tuah a duh ruang a si,” tiah Middle East ramkhel lei thlihran a cuantu thiamsang hna nih an ruah ve.

2003 ah US nih Iraq cu ral lei in a rak luh hnawh. Cu caan thawk cun Middle East ah US huham a karh ngaingai. Middle East ah a ummi Saudi Arabia, Oman, Kuwait, Iraq, UAE, Turkey, Jordan le Israel tibantuk ram pawl ah US nih ralkap hmunkhurnak le ralhriam fimnak aa ngeih dih.

Cucaah, Middle East chung Muslim ram hna lak ah a tthawngttha bikmi Iran nih a inntual ciacia ah a huham a ngan chin thluahmahmi US lehrul ding in 2003 thawk in a hun cawlcangh ve hi a si, tiah thiamsang pawl nih an langhter.

Latest News

News in Burmese