US nih Iran Cung Dantatnak Thar a Pekmi Kong Thawng a Thanh

| The Chin Journal | Hakha, Chin State

US nih Iran ram cung ah dantatnak thar a tuahmi kong cu nihin ah vawleicung zapi theih in thawng a hun thanh cang.

January 3 ah US nih Iran ralbawi Major General Qassem Soleimani a thah i, Iran nih January 8 ah Ballistic Missile in Iraq ram i US ralkap hmunkhuarnak al-Asad Base a kah ve.

Iran nih US ralkap hmunkhuarnak al-Asad Base a kah ruang ah US nih atu bantuk in sipuazi dantatnak a thar in a hun khinh tthan hi a si.

Iran ram i leichungchuak sipuazi rianttuannak (Lungmeihol, lunghring, tbk.), thilpuan/thilthaan lei sipuazi rianttuan le sehzung rianttuannak pawl hi atutan US nih Iran cung ah dantatnak a thar in a tuahmi an si hna.

Cu lawng si loin, Iran ramhruaitu luzik Ali Khamenei kuttang rianttuantu minung pariat cung zong ah pumpak in US nih dantatnak a tuah hna.

“Atu bantuk in US nih Iran cung ah dantatnak kan tuahnak aruang cu Iran nih vawleicung hmun kip ah ralhrang pawl thazaang pek le bawmhnak pek in rian a ttuanmi hi ngol seh ti kan duh caah a si. Iran nih ralhrang dirkamh le bawmhchanh in rian a ttuanmi a ngol hlanlo sipuazi dantatnak pehzul in kan tuah lai,” tiah US Ngunkhuai Zung secretary Steven Mnuchin nih a chim.

Cherhchan:  Fox News

Latest News

News in Burmese