US Nih Iran Central Bank Pi Cung ah Dantatnak a Tuah Taktak Cang

| The Chin Journal | Hakha, Chin State

Nihin ah US nih Iran ram i Central Bank pi le a dang phaisa lei riantuannak Organization pahnih cung ah dantatnak a hun tuah taktak cang, tiah theih a si.

US nih dantatnak a tuahmi pathum hna cu Iran rampi Central Bank, Iran ramchung zinan le gas in an hmuhmi phaisa pawl ramchung thanchonak ca ah a tawlreltu National Development Fund of Iran le Etemad Tejarate Pars Co., timi hna hi an si.

Saudi Arabia ram ah a ummi vawleicung zinan sehzung ngan bik hmun hnih cu September 14, chun sml. 1:00 hrawng ah drone vanlawng pahnih in kah an tong.

Ahmasa ah cun Iran nih a bawmhmi Houthi ralhrang nih an kah tiah an ruahdamh nain pehzul in hlathlainak an tuahmi tehte pawl an zohfel tikah zinan sehzung pahnih a kaptu hi Iran hrimhrim a si, tiah an zumh.

Saudi cozah nih a ngeihmi vawleicung a ngan bik zinan sehzung kah an ton tikah vawleicung zinan market zong a hun hnorsuan colh.

Cucaah, nizan ah US President Donald Trump nih Iran cung ah dantatnak tuah ding in timhtuahnak kan ngei tiah a rak chim i atu ah dantatnak a hun tuah taktak hi a si.

Saudi zinan sehzung kahnak ah an hmanmi bomb a tlolhmi pawl zohfelnak an tuah i Iran ser bomb hrimhrim an si tiah a phi an chuah ko nain Iran nih cun hi zinan sehzung kahdohnak kong ah hin pehtlaihnak kan ngei lo, tiah atu tiang a chim peng.

Latest News