US Mibawmtu Nungak a Thattu ISIS Ralhrang Pahnih US ah Taza an Cuai Hna

| The Chin Journal | Hakha, Chin State

Syria ram ah ral ruang ah harnak a tongmi pawl a bawmtu US nungak Kayla Mueller (26) telh in US rammi pali a thattu ISIS ralhrang pahnih cu US ah tazacuai hram an thawk cang hna, tiah US Department of Justice nih a langhter.

Tazacuaimi ISIS ralhrang pahnih cu Alexandar Amon Kotey (36) le El Shafee Elsheikh (32) an si.

Hi ISIS ralhrang pahnih nih hin US rammi mibawmtu Mueller, Journalist James Foley, Journalist Steven Sotloff le mibawmtu Peter Kassig cu an rak thah hna.

Journalist James Foley, Journalist Steven Sotloff le mibawmtu Peter Kassig an thah hnanak video zong ISIS ralhrang nih vawleicung mizapi tlerhkhawnak ah an rak tar.

US mibawmtu nungak Mueller hi Doctors Without Border timi bu he rian a rak ttuannak Syria ram Aleppo khua ah 2013 ah ISIS ralhrang nih an rak tlaih i, February 2015 ah an rak thah.

ISIS ralhrang Alexandar Amon Kotey le El Shafee Elsheikh cu Syria ah a nung in an tlaih khawh hna i tu thla October 7 ah khan US ah kuat an si.

Virginia ramkulh, Alexandria khua biaceih zung ah a voi khatnak bik biaceihnak an tuah te hna lai.

October 26-27, 2019 ah US ralkap nih Mueller minbunh in Operation Kayla Mueller timi an tuah i, Syria ram Bairsha khuahriang ah ISIS ralhrang pawl cu an kah hna.

Cu Operation Kayla Mueller ah cun US nih ISIS ralhrang bawizik Abu Bakr al-Baghdadi a rak thah khawh.

Cherhchan: CNN, Washington Post

Latest News

News in Burmese