US: “Iran Hacker Bu nih US Vote Thlatu Hna Konglam Fir an Timh”

| The Chin Journal | Hakha, Chin State

US vote thlatu hna i konglam (Data) pawl fir ding in aa zuammi bu hi Iran Hacker bu an si, tiah US cozah nih sual a phawt.

October thlathawh lei ah US rammi vote thlatu a thongthong sin ah Email in tlerhkhawnnak video file a lut i cu kong he pehtlai cun hlathlainak an tuah hnu ah US cozah nih Iran cung ah a kutdong a sawh hi a si.

Cu tlerhkhawnnak video cu FBI le Department of Homeland Security’s Cybersecurity and Infrastructure Security Agency (CISA) nih zohfelnak ttha tein an tuah tik ah US thimnak cung ah hnahnawhnak pek ding in timhtuahnak an ngeihmi a si ko, tiah lenglang in cun fehternak an tuah.

The Chin Journal Hnubik Thawngpang

Email ah a lutmi video ah cun President Donald Trump lei ttang deuh phun in bia an i chimter i, “US vote thlatu hna mincazin le konglam an ttialnak data kan hack khawh caah US thimnak cung ah buaibainak kan ser khawh,” tiah tlerhkhawnnak bia an chim.

Cu video cu an zohfel tik ah “Vote thlatu hna tlerhkhawnnak menmen ah an tuahmi si dawh a si,” tiah thiamsang pawl nih an ruahdamh.

Asinain, atu tiang ah hi Hacker Bu nih hin US vote thlatu hna konglam pawl an hack kho ngaingai maw timi fiang in fehter khawh a si lo.

2016 US rampi thimnak lio ah buaibainak chuahpi ding in a rak i zuamtu Russia Hacker bu zong nih atutan thimnak zong ah California le Indiana ah hram a bunhmi Democratic Party chungtel upa hna i konglam fir khawh ding in an i zuam, tiah Reuters thawngzamhnak nih a langhter.

[Cherhchan: Reuters]

Latest News

News in Burmese