US Delta Froce Ralkap (70) nih ISIS Bawizik an Luh Hnawh Ningcang

| The Chin Journal | Hakha, Chin State

A tanglei kan langhtermi “US Delta Force ralkap (70) nih ISIS Bawizik an Luh Hnawh Ningcang” hi US President Donald Trump le US National Security Adviser Robert O’Brien nih ISIS ralhrang bawizik Abu Bakr al-Baghdadi an thah ningcang an chimmi chung in lakmi a si.

October 26 zanlei sml. 5:00 (US Nicaan le Suimilam) hrawng ah President Trump le US rampi runvennak ah luban a simi pawl cu White House innkhaan pakhat chung ah an i pum hna i US ralkap pawl nih ISIS ralhrang bawizik Baghdadi an luh hnawh lio cu Live in an zoh.

US nih Baghdadi a nung in siseh, a thi in siseh tlaih khawh ding in kum 6 chung sapel in an pel hnu ah atu ah an vun luh hnawh taktak hi a si.

Mah hlan ah US nih Bagjdadi luh hnawhnak hi voi 3 hrawng tuah a rak timh i voi 2 cu aa rak let tthan. Cun, voi khat cu a rak luh hnawh bal nain tlamtlinnak a rak hmu lo.

American CIA nih Baghdadi a si tiah an lunghrinhmi pa a hnu in an dawinak hi a zarh in a si ve cang. Cu pa cu Baghdadi a si ko tiah an zumh caah October 26 zanlei sml. 5:00 hrawng ah luh hnawhnak an tuah hi a si.

Syria nitlak-chaklei ah a ummi ISIS ralhrang bawizik Baghdadi aa dupnak an timi innpi lei ah US ralkap Helicopter pariat an run zuang cuahmah.

Inn an vun naih deuh ah US Helicopter pawl cu ralhrang pawl nih meithal in an rak kah chih. US helicopter pawl nih Machine Gun le bomb hmang in Baghdadi aa dupnak inn cu fak taktak in pehzul in an den colh ve.

US Delta Force nih ISIS ralhrang bawizik aa dupnak in ah luh hnawhnak an tuah dih hnu thil sining. (Photo by Omar HAJ KADOUR / AFP) (Photo by OMAR HAJ KADOUR/AFP via Getty Images)

Helicopter a kaptu ralhrang pawl an thah dih hna hnu ah US ralkap Helicopter pawl cu inn pawng ah an ttumter hna i US ralkap (70) cu Helicopter chung in an run chuak.

Baghdadi aa dupnak innchung lei luhnak kutka in luh loin inn an kulhnak tlakrawh vanpang cu US ralkap nih bomb in an puah hmasa. Cuka in cun Baghdadi aa dupnak inntual chung ah cun US ralkap pawl an lut.

Inntual chung an luh hnu ah ISIS ralhrang cheukhat hriam a chiami an um. Hriam a chia lomi paoh cu US ralkap nih a hmun ah thilak in an kah dih hna.

Baghdadi aa dupnak inn ah hin zaamnak ah hman dingmi leitang khor a um. Asinain, cu khor zong cu a hlat lei in US ralkap nih an rak bawmh dih cang. Baghdadi ca ah luatnak lam a um ti lo.

“Baghdadi cu ngakchia pathum he luatnak khor hmang in an zaam i, a aikio pah len. Thinphang thlalau tuk in a um. US ralkap uico fim pawl nih an dawi hna. Nunpek bomb aa puah hnawh i ngakchia pathum he cuka khor chung ah cun an nunnak a liam. Bomb puah ruang ah khor cu a cim i a nanh chih hna,” tiah President Trump nih a chim.

Zaamnak ah an hmanmi khor chung ah ngakchia pathum he nunpek bomb aa puah hnawhmi pa hi Baghdadi a si le si lo fehter nakding ah DNA checknak an tuah i ISIS ralhrang bawizik Baghdadi a si ko, tiah an fehter.

US ralkap nih Baghdadi an luh hnawhnak hmun cu zoh tik ah inn zong an cim dih. Motor pawl zong an kaang dih.

Baghdadi luh hnawhnak ah hin US nih ralkap uico fim pakhat zong a hman hna i cu uifimte cu hliamhma a pu.

ISIS ralhrang bawizik Baghdadi a rak i thuhnak hmun hi Syria ram nitlak-chaklei, Idlib peng chung ah a ummi Barisha khuate pawngte ah a si.

Kum 6 chung US nih a nehnang a dawi hnu ah atu an hun thah khawh hi a si. ISIS ralhrang bawizik aa dupnak theih khawh ding in hlathlainak lei ah Kurd hriamtlai Syrian Democratic Force (SDF) nih biatak tein US bawmhnak a pek.

ISIS ralhrang luh hnawhnak ah US nih Helicopter pariat le Middle East ah hmun a khuarmi US Delta Force in ralkap 70 a hman hna i uico fim zong a hman hna.

US Delta Force nih Baghdadi an thah khawhmi kong he pehtlai in President Trump nih, “Baghdadi cu uithih bak in a thi, zaangfak taktak a si,” tiah a chim.

Suimilam pahnih chung hrawng US Delta Force nih Baghdadi luh hnawhnak operation an tuah hnu ah Baghdadi aa dupnak innpi cu bomb in vawlei ah bok viar in an den ta.

Latest News