US Chinmi Pahnih Accident an Tonnak Hmun ah Zu Palang an Hmuh

| The Chin Journal | Hakha, Chin State

US ram, Illinois State chung ah a ummi Chapin khua pawng in highway no. 67 cung ah Chinmi pahnih citmi motor le a dang motor pakhat khawndennak an tong i minung pathum an nunnak a liam.

Illinois nicaan in June 16 zanlei sml. 5:30 hrawng ah hi thil a can hi a si i, Morgan County palik zung le Chapin Volunteer Fire Department nih khawndennak a can hmun ah cun mibawmhnak an vung tuah.

Fak tuk in khawndennak a can ruang ah an ruak pawl cu motor chung ah an i tenh i har ngaiin an chuah hna.

Motor khawndennak a cannak hmun ah zu palang an hmuh pin ah Chinmi pahnih an i citmi motor chung ah minung dang i ID zong an hmuh.

Ohio ah a ummi Rev. Dr. Hai Vung Lian nih cun, “Zu an ri. Mi motor an mongh. Motor ngeitu pa nih a ID kha a motor chung ah a philh sual i, cuticun palik nih motor ngeitu a inn ah thil sining an vung chimh,” tiah a chim.

Morgan County palik zung in tuanvo ngeitu palikbawi Mike Carmody nih, “A thimi pathum lak ah pakhat hi cu Morgan County ah khua a sami a si tiah kan ruah. Asinain, a dang pahnih belte hi aho an si kan thei rih hna lo. Atu bantuk in khawndennak a cannak aruang bik hi zu ruang ah a si kho tiin kan ruahdam. Asinain, an ruak checknak an tuah dih tikah thil sining fiang cu theih si te lai,” tiah a chim.

Motor khawndennak in a nunnak a liammi Chinmi pahnih cu Indiana ah a ummi Kham Cung le Thal Lian Lo an si i, Illinois sathahnak sehzung pakaht ah rian a rak tuanmi an si, tiah theih a si.

-KHQA

Latest News

News in Burmese