US ah a Ruak in Charmi Myanmar Nute nih “Vanram ah kan i Tong Than Hna Lai” Timi Ca a Chiah Ta

| The Chin Journal | Hakha, Chin State

US ram, Oklahoma ah nihnih chung a tlau hnu ah a ruak in an hmuhmi Myanmar nute Ma Su Hlaing (kum 16) nih “Vanram ah kan i tong than hna lai” timi ca a chiah ta tiah kum 48 a simi hringtu a nu nih a chim.

Ma Su Hlaing cu Oklahoma khua i Northwest Classen High School ah sianginn a kai liomi a si i, Oct. 9 ah an sianginn ah program pakhat a um i cuka hmun a kalnak in cun inn a panh ti lo.

Oct. 12 ah Ma Su Hlaing i a ruak cu Lake Overholser Dam nichaklei hraap ti chung ah an hmuh.

Ma Su Hlaing a ttang Jin Lett nih, “Atukar cu bia zong tam a chim lo. A ngaih a chiami a lo,” tiah a chim.

“Anih hi mi hmurka tlawm a si. Hawikom zong tam a ngei lo. Lungdernak fak tuk in a tong kho,” tiah chungkhar pakhat nih a chim ve.

Ma Su Hlaing i hringtu nu nih, “Ca pakhat a chiah tami a um. A ca ka rel hnu lawng in zeitluk in dah ka fanu hi harsatnak a rak ton timi ka theih. Vawleicung ah nun duh ti lo tiang in lungdernak a tong. A chiah tami ca chung ah Vanram ah kan i tong tthan hna lai tiah a ttial,” tiah a chim.

Ma Su Hlaing ruak cu checknak tuah ding in sizung ah an kuat i a ruak an checkmi a phi a chuah tik ah zei ruang ah dah a thih timi thawngthanhnak kan tuah tthan te lai, tiah Oklahoma City Police Department nih thawng an thanh.

-News 4

Latest News