U Wirathu Cu “A Zaammi Misual” Tiah Biaceih Zung Nih Thawng a Thanh

| The Chin Journal | Hakha, Chin State

Western Yangon District Court nih U Wirathu tlaih ding in May 29 zaan ah nawl a chuah nain atu tiang an tlai kho lo i Kayin ram ah a zaam, tiah thawngpang a chuak.

June 4 tiang biaceih zung ah a rak phak lo caah ahlan taza an cuainak Yazathetgyi pohma 47/2019 cu Western Yangon District Court nih Yazathetgyi pohma 39/2019 ah a thlen i U Wirathu cu “A Zaammi Misual” (Fugitive) a si tiah thawng a thanh.

Atu bantuk in biaceih zung nih thawng a thanh cang caah U Wirathu cu a umnak a theitu rammi nih nawlngeitu sin ah thawngthanh khawh a si pin ah rammi nih tlaih i palik sin ah ap khawh a si.

Taza an cuainak pohma an thlen bantuk in U Wirathu biaceih zung chuahpi nakding nicaan zong June 11 ah an thawn ve.

U Wirathu cu Western Yangon District Administration zung uktu chang a simi U San Min nih pohma 124 (a) in taza a rak cuai.

Myanmar cozah kha mipi nih an huat nakhnga le buaibainak chuahpi ding in U Wirathu nih tuksawhnak bia a chim zungzal ruang ah atu bantuk in tazacuai a ton hi a si.

Western Yangon District Court nih U Wirathu tlaih ding in May 29 zaan ah nawl a chuah.

Cu caan thawk cun Yangon palik le Mandalay palik nih U Wirathu cu tlaih ding in an kawl. Mandalay i a umnak Ma Soe Ying phungki sianginn zong ah an vung kal hnawh nain a um lo.

Yangon khuachung zong ah an kawl len. Atu zong ah Mandalay khuachung ah an kawl len. Asinain, a phone zong a thah i a umnak theih a si ti lo.

U Wirathu taza an cuainak pohma 124 (a) ning ah “Acozah kha mipi nih an huat nakhnga, an upat lo nakhnga mipi sin ah forhfialnak a tuahtu cu tangka dantatnak le nunchung thong dantatnak pek khawh an si lai,” tiah aa tial.

Kan hnu April 29 ah khan Taningtharyi ramthen, Meik khua ah U Wirathu nih biachimnak a rak ngei i cu lio ah cun minung tam taktak nih a biachim an rak ngai.

Cu biachimnak ah cun U Wirathu nih, “Mah hlan kan ram uktu pawl nih cun leichungchuak thilri lawng an fir; asinain, atu a kan uktu hna nih cun rammipi kaa an purh i an fir. Mipi nih harlefe ngaiin an i kawlhawl sekmi cu uktu lei nih ngunkhuai an ti an hal hna, budget zong uak deuh in hal a si rih, an zapi in mifir lawngte an si ko. Fir sawhsawh hmanh a si lo; a purh bak in an purh,” tiah a rak chim.

Cu lawng si loin May 5 ah Yangon City Hall hmaika ah tuahmi baichimnak ah, “Hluttaw chung ah a thumi ralkap MP pawl khi rammi nih pathian bantuk in kan biak hna awk a si,” tiah U Wirathu nih a rak chim rih.

A cunglei bia a chimmi pawl nih Myanmar rampi a tlerh i Kawl phun tanhtu mibu tawsawh in buaibainak chuahter a timh, tiah mi tampi an hmuh.

Latest News