Tutan Tanghra Camipuai Phit Khawh Dawh a Si Ti Lo Tiah Hringtu a Pa Nih a Chim

| The Chin Journal | Hakha, Chin State

Rakhine ramkulh, Kyauk-daw khua ah Kawl ralkap nih mah le mah hngal lo tiang in an velhmi tanghra siangngakchia pa tutan tanghra camipuai phit khawh dawh a si ti lo tiah hringtu a pa U Shwe Sein Oo nih a chim.

Feb. 21 ah Kyauk-daw khuami tanghra siangngakchia pa Mg Zaw Naing Naing Htey cu mawtaw cycle datsii rawnnak in inn a ttin lei lampi ralkap zung hmai a phanh ah an tlaih i an velh tiah hringtu a pa U Shwe Sein Oo nih a chim.

Hi kong he pehtlai in U Shwe Sein Oo nih a veltu Kawl ralkap pawl cu Kyauk-daw palik sakhan ah report a tuah hna. Asinain, thawng dikhmaan lo nan thlah tiin anmah ralkap zung in bawi pakhat nih Mg Zaw Naing Naing Htey hringtu a pa le facebook ca thlahtu Kyauk-daw khuami U Kyaw Hla Myint cu tazacuai a timh chap hna.

“Keimah lila kha Kawl ralkap nih case an ka on tiah an ka chimh, kei zeihmanh ka hngal lo. Facebook zong ka zoh lo ruang ah zeihmanh ka hngal lo, hika hin ka fapa he kan um, ka chimmi hi thil dikhmaan lawng te a si. Keimah nih ralkap cu taza ka cuai hna, ka fapa a tuahto tu phuang hna u, taza an ka cuai ve ahcun ka el hna lai. Tette ka ngei dih, ka fapa hi rak zoh ko u” tiah hringtu a pa nih lungfak ngai in a chim.

Atu ah Mg Zaw Naing Naing Htey cu Sittway siizung ah an thlopbul cuahmah lio a si. Dam lei a panh hlei lo caah tutan tanghra camipuai zong phit khawh dawh a si ti lo tiah hringtu a pa U Shwe Sein Oo nih a chim.

“Atu a sining hi dam lei a panh hlei lo, amah le mah aa hun hngalh caan a um nain tihphannak a ngei zungzal. Atu tiang zeihmanh a ei lo, siibawite nih na fapa hi tihphannak a ngei zungzal, asinain a nunnak caah cun thinphan awk a um lem lo an ka ti” tiah hringtu a pa nih a chim chap.

-RFA & Myanmar News

Latest News