Tuluk Rammi Pathum Wa Cozah nih Meithal Kahnak in Thihdan a Pek Hna

| The Chin Journal | Hakha, Chin State

Shan ramkulh, Wa mahte uknak nawlngei hmunram dawr thilri ramhnak le thahnawnnak sual a tuahtu Tuluk rammi pathum cu May 14 ah Wa cozah nih meithal kahnak in thihdan an pek hna, tiah theih a si.

May 3 ah khan Tuluk rammi pathum nih Nam Tih khua i sui dawr pakhat an luh hnawh i sui pawl an fir pin ah dawr ngeitu an thah.

Wa ralkap (UWSA) nih an tliah khawh hna i nihin ah mizapi hmaika ah meithal kahnak in thihdan an pek hna hi a si.

Wa hmunram ah thilfir, tlaihrem, mithah le ritsii zuarnak sual a tuahtu pawl cu ahlan zong ah thihdan pek an rak si tawn.

UWSA cu 1989 thawk khan ralkap cozah he kahdaihnak an rak tuah i, Wa hmunram zong mahte uknak nawlngei (Wa Self-Administration Division) ah theihpi a si.

Cucaah, Wa hmunram ah cun anmah tein ralkap, palik,  biaceih zung, Immigration zung, fimcawnnak le ngamdamak tibantuk an i ngeih dih.

Latest News

News in Burmese