Tuluk Pastor Thah a Ton Hlan ah North Korea Minung 1,000 Sin ah Thawngtha a Chim

| The Chin Journal | Hakha, Chin State

Khrihfami ca ah tih a nun tuknak North Korea ram ah thawngtha a phuangtu Tuluk pastor Rev. Han Chung-Ryeol cu thah a ton hlan ah North Korea rammi 1,000 sin ah thawngtha a chim manh, tiah North Korea in a zaammi minung pakhat nih a chim.

Rev. Han hi Tuluk-North Korea ramri khua Changbai ah Pathian riantuan in a ummi a si i, 2003 ah khan tlaih hrimhrim ding in North Korea cozah nih order a chuahmi a si.

Changbai khua ah Pathian rian a tuan caan chung ah Rev. Han nih North Korea misifak le innlo ngei lo pawl milu a thong in tirawl a pek hna i a zohkhenh tawn hn.

Rev. Han nih a zohkhenhmi lak ah Sang-chul tiah auhmi North Korea ram in a zaammi pa aa tel ve.

Sang-chul nih The Voice of the Martyrs timi Khrihfa thawngzamhnak sin a Rev. Han konglam cu a chim.

“North Korea ram Primary School ah cun Khrihfa missionary paohpaoh hi ralhrang an si tiin kan cawn. Ahmasa ah cun missionary pawl cu mitha bantuk in an i umter ko lai. Nan innchung ah an rak luh tik bel ah cun an i thah hna lai i nan thin an in ei hna lai tiin a kan cawnpiak,” tiah Sang-chul nih a chim.

“Pastor Han nih nunnak dongh tiang in Pathian rian a tuan. Amah thawng in North Korea rammi tampi nih hmailei ruahchannak timi kan ngei. Pathian thawngtha karhchoter ding in rian pehzul in kan tuan ve lai,” tiah a chim chap.

Rev. Han cu 2016 ah khan North Korea cozah nih a thlahmi mithattu nih nam in an sawh pin ah hreitluk in an tuk i a nunnak a rak liam.

Sang-chul nih, “Pathian ram ca ah rian kan tuahmi vialte hi Pastor Han nih kan cung ah a rak tuahmi bang in theipar tampi ngei ve hram seh timi ruahchannak kan ngei,” tiah a chim.

Voice of the Martyrs thawngzamhnak nih, “Nunthaap in North Korea ram ah Pathian rian a tuanmi Khrihfa kan unau hna caah thlaza campiak hna u sih,” tiah forhfialnak an tuah ve.

Atulio North Korea ram thonginn pawl ah zumhnak ruang ah thongthlak a tongmi Khrihfa 50,000 hrawng an um, tiah an zumh.

-Fox News

Latest News

News in Burmese