/

Tuluk le Taiwan Entainak a Linhsat Lio ah US nih Raldohnak Tilawng South China Sea ah a Thlah

The Chin Journal | Hakha | Chin State

Tuluk le Taiwan ram karlak entainak a hun linhsat ngai lio ah US nih raltuknak tilawng pali South China Rili ah a thlah, tiah theih a si.

Tuluk nih Taiwan rili hmun Pratas Islands kiangkap ah bomb thlatu vanlawng pawl le Fighter vanlawng pawl a zuanter caah Taiwan le Tuluk karlak ah atukar entainak a hun chuah hi a si.

US nih raltuknak vanlawng tampi a phortu Theodore Roosevelt timi tilawngpi le a dang raltuknak tilawng pathum cu Zarhte ni ah South China Rili ah a thlah hna.

US nih raltuknak tilawng pawl a kalternak South China Sea hrawnghrang hi Tuluk nih keimah rili hmun tiah a ti caah kiangkap ram Taiwan, Vietnam, Malaysia, Philippines le Brunei ram hna he rili hmun kong ah kumtin an buaibai.

Hi South China Rili hi Pacific Ocean cung ah a ummi a si i, vawleicung chawlehthalnak ca lawng ah si loin raltuknak lei ca zong ah abiapi ngaimi rili hmunhma a si.

US nih raldohnak tilawng pawl South China Sea ah a thlahmi kong he pehtlai in, “Vawleicung chawlehthalnak thilri cheuhnih-cheuthum hi mahka South China Rili in hin phorh a si i, hi rili hmun hi abiapi tuk. Cucaah, hi rili hmun ah ahopaoh nih zalong tein an umkal khawh nakhnga runvennak kan tuah hi a si,” tiah US ti ralkap bu ah Rear Admiral a simi Doug Verissimo nih a chim.

US President thar Joe Biden zong hi South China Sea humhimnak kong le Tuluk ram he pehtlaihnak kong ah Donald Trump policy bantuk in a kalpi thotho lai tiah a ruah.

Cun, Biden nih Secretary of State ca ah thim ding in min a tarmi pa Antony Blinken zong nih, “US rampi ca ah zuamcawhtu ngan bik cu Tuluk ram hi a si,” tiah a chim ve.

Cherhchan: Reuters

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.