Tuluk Inntek Nih Tlunter Duhlomi Biak Tha Sung Chungkhar He Pehtlaihnak a Cat

| The Chin Journal | Hakha, Chin State

Tuluk ram, Chong Qing khua ah Tuluk chungkhar sin ah sinum rian a tuanmi Lainu Biak Tha Sung cu inntek nih Kawlram ah tlunter duh loin hramhram in an khenkham hnu ah Kawlram lei a chungkhar he pehtlaihnak a cat, tiah a chungkhar nih The Chin Journal ah an chim.

Kum 29 a simi Biak Tha Sung cu Singapore ram ah kal ding in timhtuahnak a rak ngei nain a tlamtlin lo ruang ah September 2016 ah khan Tuluk ram tu ah a rak kal.

“Ahmasa ah cun Singapore ah kal aa tim. A tlamtlin lo caah Tuluk tu ah a kal. Zeitindah Tuluk lei a kal ning si ti belte hi kan thei lo,” tiah Biak Tha Sung a unu vapa a simi Kalay peng Hmandaw RC Pastor Bawi Kam nih a chim.

Biak Tha Sung nulepa hi Sagaing ramthen, Kalay peng, Kuhkul Ohsuh chung ah a ummi Siataw khua ah khua a sami an si.

Biak Tha Sung nih Kawlram lei ah rak tlun ding in a umnak inntek sin ah voi 3 tiang a hal hna. Asinain, inntek nih tlunter duh loin an hren peng.

“2018 ah khan Kawlram ah tlun ding in inntek sin ah a hal hna. Cun, January 2019 zong ah khan a hal hna. Mah cun March thla zong ah khan a hal than hna nain tlunnak nawl an pe lo. ‘Palik zung ah ka report hna lai, keimah zong ka tlai ko hna seh’ a kan ti. Cu hnu May 12, zanlei sml. 5:00 hrawng ah khan palik zung ah ka um tiah a kan ti,” tiah Pastor Bawi Kam nih cun a chim chap.

Biak Tha Sung i Hmandaw lei a chungkhar nih Tuluk ram ah pehtlaih awk hawikom le theihhngalh an um lo ca ah le atu tiang palik zung ah maw a um rih timi a thawngpang an theih ti lo caah an lungre a thei i atu bantuk in thil sining a theihngaltu an um hngamaw tiin bawmhhalnak an tuah hi a si.

Tuluk ram ah caan saupi a um cangmi kan Lainu nih cun, “Palik nih an tlaih hna asiloah palik sin ah an i ap a si ahcun thla khat asiloah thla hnih hrawng thong an tla tawn. Cu hnu cun Kawlram lei ah an kuat hna. Asinain, micheu cu Ruili an phak in Kawlram ah tlung loin an kir than tawn,” tiah a chim ve.

Biak Tha Sung kong he pehtlai in thil sining a theitu nan um a si ahcun Phone – 09784131356 le 09259426947 ah pehtlaihnak rak kan tuah hram u, tiah chungkhar lei in bawmhalnak an tuah.

Latest News