Tukum Chung ah Tial Cung Thang Le South Korea Pa an i Phomh Ve Lai

| The Chin Journal | Hakha, Chin State

Atukum chung ah Malaysia ram ah tuah dingmi One Championship thongh suamnak puai ah Tial Cung Thang le South Korea pa an i thong lai, tiah amah Tial Cung Thang nih The Chin Journal ah a chim.

Tial Cung Thang cu One Championship ah a luh hnu, March 2019 ah khan a chuahkehnak Myanmar vawlei ah a voi khatnak bik One Championship Ring chung ah aa thong.

Cu lio ah cun Cambodia rammi Rin Saroth he an i phomh i Laipaih ningcang dawhdawh hmang in Rin Saroth cu a rak tei.

Tial Cung Thang nih, “Kei zong atu kumdongh lei ah puai khat ka ngei rih. Malaysia ah a si lai an ti. South Korea pa tthawng pakhat he kan i tthua lai. Asinain, catlap cung minsen thutnak pakhathmanh kan tuah rih lo,” tiah a chim.

Aung La nih Brandan Vera a teimi kong zong ah Tial Cung Thang nih, “Atutan ka upa Aung La nih Vera a teimi cung ah ka lawm tuk. Ka lawmh tuk ah bia in chim awk hmanh ka thei lo. Keimah nih teinak nganpi hmuh bantuk a si,” tiah a lunglawmhnak a langhter.

One Champion nih August 2018 ah khan 2019 chung thongh zuamnak puai a tuah dingmi nicaan le hmun pawl a rak langhter i, Malaysia ram ah hin December 2019 ah puai khat tuah ding in timhtuahnak an ngei.

Cu puai ah cun Tial Cung Thang hi South Korea pa he i thongh te dawh a si.

Latest News