Tlangcung Hriamtlai Lei Nih Kahdohnak an Ngol Chung Nain Kawl Ralkap Nih an Kah Hna

| The Chin Journal | Hakha, Chin State

Northern Alliance chungtel TNLA, MNDAA le AA nih September 2 ah khan Shanram nichaklei kahdohnak kan ngol chung tiah thawng an rak thanh nain Kawl ralkap nih an kah thotho hna, tiah theih a si.

September 7, zinglei sml. 9:00 hrawng ah Kawl ralkap nih Kyaukmeh peng ah a ummi Northern Alliance ralkap cu an kah hna.

Cun, chun sml. 1:00 ah Maingngawh peng ah Kawl ralkap nih an kah chap hna. “Kahdohnak kan ngol chung kan ti nain Kawl ralkap nih a rak kan kah caah kanmah hriamtlai lei in hliamhma a pumi cheukhat an um,” tiah Northern Alliance nih thawng an thanh.

Kahdaihnak kong he pehtlai in September 2 ah khan Myanmar Peace Commission (MPC) le Northern Alliance biaruahnak an ngeih caah Northern Alliance nih kahdohnak an ngol chung tiah thawng an rak thanh hi a si.

September 16-17 ah MPC he tonnak ngeih than ding in biachahnak an ngei i cu tik ahcun Bilateral Ceasefire Agreement minsen thu kho ding in timhtuah a si.

“Asinain, September 16-17 ah Bilateral minsen kan thu kho lai maw. Cun, ralkap nih pehzul in ceihmai an duh lai maw timi pawl zoh a hau rih i ceihmainak tuah an duh lo a si ahcun pehzul in i kahdohnak a fak than kho thiamthiam,” tiah TNLA ralbawi Major Maing Aik Kyaw nih a chim.

Latest News