Tihnung Zawtnak Ruang ah Tuluk nih Khuapi Pahnih Kutka a Khar

| The Chin Journal | Hakha, Chin State

Tuluk ram ah December 2019 in a cangmi ttihnung puicimh zawtnak ruang ah Tuluk ram i milu ting 100 leng an umnak khuapi pahnih kutka an khar, tiah theih a si.

Zawtnak aa thawknak Wuhan khua le Huanggang khua cu lenglei he pehtlaihnak ngeih lo ding in kutka khar an si i, hmundang khualtlawnnak hmun Airport, Bus Station le Tlanglawng Station pawl zong khar dih an si.

Khuachung ah minung a bu in i pumhnak tuah lo ding in kham a si i, khuachung Bus le Tlanglawng (Public Transport) pawl zong an dinhter dih hna.

Atulio Tuluk ram ah a cangmi puicimh zawtnak hi ” Coronavirus” timi zawtnak phun ah aa telmi a si i, atu tiang ah minung 17 an nunnak a liam i, 571 an i chawn.

Coronavirus hi phun 7 in a um–Tuluk ram ah a cangmi hi “Noval Coronavirus” (CoV) tiah an auhmi a si, abikin Rul in aa thawkmi zawtnak a si kho, tiah an zumh.

Wuhan khua i Seafood Wholesale Market in hi “Noval Coronavirus” hi aa thawk tiah an zumh.

“Noval Coronavirus” cu minung le minung i chawnh khawhmi a si. Taklinh, thawchuah har, Kal le Thin a rawhter i, fak piin khuhkhuh le kiktlaih tibantuk in zawtnak a lang tawn.

Vanderbilt University ah Professor a simi Dr. Bill Schaffner, “Atulio Tuluk ram ah a cangmi Noval Coronavirus zawtnak a damh khotu sii ngaingai a um rih lo. Asinain, ningcang tein conghramhmi mizaw chung in a dam thaimi an um len ve ko,” tiah a chim.

Tuluk ram ah atu bantuk in zawtnak a tlun ruang ah US ram khuapi pawl New York, San Francisco le Los Angles airport pawl ah Tuluk lei milutchuak checknak fel khun in an tuah hna, tiah theih a si.

Cherhchan: Aljazeera, CNN, BBC, Bloomberg

Latest News

News in Burmese