Thurman Nih Pacquiao Boxing Chan a Dihdonghter Lai an Ti

| The Chin Journal | Hakha, Chin State

Vawleicung boxing tuanbia ah Division pariat ah Champion a hmu khotu Manny Pacquiao le atu tiang a sung bal rih lomi Keith Thurman an i thongh nakding nicaan a hun naih thluahmah bang in atulio vawleicung boxing vawlei zong Pacquiao le Thurman kong nih a hun hninhseih thluahmah ve.

Thurman hi kum 30 lawng a si rih i puai 30 aa thong cang nain voi khat hmanh a sung rih lo. Knock Out in voi 22 teinak a hmumi a si.

Cun, Pacquiao cu atulio vawleicung ah a nungdam rihmi Boxing Legend pakhat a si tiah an upatmi a si i, vawleicung tuanbia ah amah lawnglawng hi Division pariat ah Champion a hmu khomi a si.

Micheu nih Pacquaio hi kum 40 a si cang i a upa tuk cang. Ahlan bang in a cawlcang kho ti lai lo i a thazaang zong mah hlan a lo ti lai lo an ti.

Cucaah, kum 30 a simi Thurman nih a tei khawh tiin a ruatdamhtu an um.

Mayweather CEO Leonard Ellerbe nih, “Atutan puai ah Thurman nih Pacquiao boxing chan a dihdonghter khawh. Pacquiao cu kum 40 a si cang. Boxing tongh ding ah a tar tuk cang,” tiah a chim.

Thurman hi Mayweather he i thongh a duh ngaimi a si. Asinain, atu tiang ah Mayweather nih Thurman he i thongh ding in lungduhnak a ngeih le ngeih lo a langhter lo.

Thurman nih, “Floyd Mayweather he i thongh ka duh nain atu tiang kan i thong kho lo. Asinain, atulio vawleicung boxing Legend Pacquaio he i thong kho ding ka si caah Mayweather he i thongh tluk a si ko,” tiah a chim.

Atutan Pacquaio le Thurman puai ah WBA (Super) Welterweight Champion taisawm an i cuh lai.

July 20 ah MGM Grand Garden Arena, Las Vegas ah an i thong lai i  Pay-Per-View in $79.99 hrawng in zoh khawh a si te lai, tiah an ruahdamh.

Latest News