Thluaktlinglo a Fapate a Thah Hnu ah Mi nih an Fir Tiah Report a Tuah

| The Chin Journal | Hakha, Chin State

US ram, Florida ramkulh, Miami khua ah hringtu nu nih thluak tlamtlinglo le holh thiam lo a simi kum 9 a fapate cu a thah hnu ah Minak pahnih nih an tlaih i an kalpi, tiah palik sin ah report a tuah.

May 22 ah khan hringtu nu Patricia Ripley (kum 47) nih, “Ka fapa an fiar. Minak pahnih nih motor in a kan dawi i, namte in a kan tlerhkhawn hnu ah ka fapa an kalpi,” tiah palik sin ah report a rak tuah.

Palik nih kawlhawlnak an tuah i, May 23 zinglei ah Kendale Lakes timi tibual chung ah ngakchia pa cu a ruak in an char.

Ngakchia pate hi Alejandro Ripley tiah auhmi a si i, a chuah ka tein holh a thiam lo pin ah tuaktaan khuaruahnak lei zong ah hawi a phan lomi a si.

Ngakchia pa ruak an char dih hnu tlawmpal ah “Ka fapa an fiar” tiah report a tuahtu hringtu a nu cu palik nih an tlaih colh.

A fapate hi fir a ton a rak si lo. Hringtu nu Patricia Ripley nih timh ciammam tein thah ding in tibual lei ah a rak kalpi.

Hringtu nu Patricia Ripley nih a fapa thah ding in voi hnih aa zuam. A voi khatnak ah cun a tlamtling lo i a voi hnihnak ah a thah khawh.

A voi khatnak ah a fapate cu titlaang in tla lak in a nam. Cu lio ah cun pawngkam ah pa pakhat a um i ti chung ah a tlami ngakchia pa cu a khamh khawh.

A voi khatnak thah a timh i a tlamtlin lo hnu suimilam pakhat hrawng a rauh ah Patricia Ripley nih a fapa cu mi an kin deuhnak titlang lei ah a kalpi tthan i ti chung ah a nam tthan.

Atutan cu ngakchia pate a khamhtu ding minung kiangkap ah an um ti lo. Cuticun ngakchia pate cu Kendale Lakes tibaul ah a nunnak a liam.

Hringtu nu Patricia Ripley cu palik nih bia an hal hnu ah a fapa a thahmi kong a hun i phuan tthan.

“Keimah nih ka thah ko. Asinain, hi kan vawlei nakin a naum deuhmi le a tlamtling deuhmi hmunhma ah a phan ko lai,” tiah a sual aa phuan pah in Patricia Ripley nih a chim.

Zei ruang ah dah hringtu nu pakhat a simi Patricia Ripley nih a chungchuak fa hi atu bantuk in timh ciammam tein a thah timi kong fiang in theih a si rih lo.

Ngakchia pate a nu kut in thah a tonmi thawngpang nih Florida hrawnghrang mi tampi ngaihchia in a chiah hna.

Miami palik bawi Alfredo Ramirez nih, “A nu nih a voi khatnak thah a timh lio ah cun minung pakhat nih a khamh khawh. Asinain, a voi hnihnak ah cun khamhtu a ngei ti lo. Ngakchia pate hi holh a thiam lomi a si i, amah ca ah cun hringtu a nu hi a awaan le a zeizong vialte a si. Vawleicung ah a tlaihchan bikmi le aa bochan bikmi cu hringtu a nu hi a si. Sihmanhsehlaw, cu tluk in a tlaihchanmi le aa bochanmi a nu cu a caah ttihnung bik ral tu ah aa cang,” tiah ngaihchia ngaiin thawnglatu hna sin ah a chim.

Latest News

News in Burmese