Thlichia Denmi Innrawk Lakah an Hmuhmi Bible Cacaang nih Thazaang Thar a Pek Hna

| The Chin Journal | Hakha, Chin State

US ram, Tennessee ramkulh ah a hrangmi Tornado thlichia nih Cookeville khua cei tuk in a den i inn a rawk pawl lak ah Baibal ca a kau buin a rak ummi an hmuh.

Innrawk lak ah Baibal ca a hmutu hi Tennessee Tech University ah a kai lio siangngakchia pahnih an si.

Baibal ca cu i kau cia tein a rak um pin ah aa kaumi Baibal ca chung i cacaang nih milungthin a hun damter khun. Jeremiah 46:27 kha a si.

“Sihmanhsehlaw maw ka sal Jakob, ṭih hlah. Maw Israel, na hnabei dong hlah; Zeicahtiah ram hlapi khan him tein kan kirpi ṭhan hna lai i nan tefa hna cu sal i an tannak ram khan ka kirpi ṭhan hna lai. Jakob cu thadam tein a um ṭhan lai i nunnuam le thinphang lo tein khua a sa ṭhan lai.” timi Baibal cacang hi a kau cia tein an hmuhmi Baibal ca ah a rak um.

“Minute 10 thilri kawlhawlnak kan tuah hnu ah hi Baibal hi kan hmuh. Baibal cacang aa ttialmi te kan rel tik ah atulio kan khua Cookeville ca ah thazaang thar petu taktak a si,” tiah Baibal ca a hmutu lak ah pakhat a simi Jorja Gust nih a chim.

“Hi Baibal ca nih a chim duhmi cu thlichia nih a denmi Cookeville khuate hi daihnak le hnangamnak in a khat tthan lai ti hi a si. Cucaah, hi Baibal cacaangte thawng hin ruahchannak kan ngei tthan ko,” tiah Gust nih a chim chap.

Baibal a hmutu siangngakchia pakhat a simi Lauren Jackson nih, “Hihi Pathian thiltinak bak a si. Amah nih a kan hman i mah Baibal hi kan hmuhmi a si tiah ka zumh. Thlichia lak ah hi Baibal cacaang thawng hin Amah Pathian hrimhrim nih thazaang pek a kan duh caah a si ko,” tiah a chim.

Baibal ca a hmutu siangngakchia pahnih hi Tennessee Tech University ah cacawng lio an si i, thlichia hartuar hna ca ah volunteer in bawmhnak a pemi an si.

March 3 ah Tennessee ramkulh, Nashville ah a hrangmi Tornado thlichia ruang ah a tlawmbik minung 25 an nunnak a liam i minung 3 an tlau.

Minung khuasaknak inn le rianttuannak inn 460 leng a hrawh i chungkhar 9,700 leng Electric Power loin khua an sa hna.

Latest News

News in Burmese