/

“Thaizing Zong Zung Kan Kai Lai Lo” – Hakha GAD Zung Rianttuan

The Chin Journal | Hakha | Chin State

By Min Cung Sang | Nihin February 10 ah Hakha GAD zung rianttuantu 120 leng lamzawhnak ah an i tel ruang ah nihin zanlei ah an pule nih an auh hna i ralrin peknak bia bantuk le lemsoinak bia bantuk an chimh hna.

Lamzawhtu ah aa telmi GAD rianttuantu pakhat The Chin Journal nih minung 20 chung hrawng biaruahnak kan ngei kho i thil sining tlamtling in a chim.

February 8 thawk khan Hakha GAD (Suhpawng zung) rianttuantu minung 280 leng lak ah minung 30 hrawng CDM an tuah i zung kai loin an rak um cang.

Cu nih ah cun GAD an pu nih phone a chawnh hna i zung chikhat rat ding in (Atu bia kan ruahmi nu hi) an auh.

Zung a va kal tik ah CDM tuah in zung a kai lomi pawl mincazin an lak hna.

“Kan bawile nih a kan auh i zei ruang ah dah hi thil hi nan tuah tiah a kan ti. Kan pu pakhat nih cun a kan tthihpheih pah. Hi bantuk cawlcanghnak ah nanmah nan i tel thawng in a tlamtling lai tiah ma nan ruah ti phun zong in a kan ti. Kanmah lei in biachimnak a kan pe lo. Anmah biachim ngeihpiak khi a si ko. A tlangpi cun hi cawlcanghnak ah kan i telmi hi an duh lo tinak a si ko. Asinain, kan in ngaihthiam hna. Nan lungput le nan duhnak kan in theihthiam ko hna. Zung tu rak kan tthai u a kan ti,” tiah bia kan ruahmi nu nih cun a chim.

Zung rianttuantu 280 leng an um lak ah minung 30 fai lawng nih duhlonak an langhter tik ah CDM ah aa telmi GAD rianttuantu pawl an tha a chia ngai.

Asinain, caan karlak ah minung an i khawm tthan. Abikin, Viber Group hmang in an i pehtlai hna i, February 10 zinglei tiang hrawng ah minung 80 nih CDM ah i tel ding in min an i pe hna.

February 10 zinglei zung kai ah an pu pakhat sin ah CDM tuah an timhmi an chimh ta. An pu nih a thlauh ve hna lo. Lamzawhnak a hun chuah taktak tik ah minung 120 leng tiang CDM cawlcanghnak ah an i tel hna.

“Nihin zanlei ah a kan auh tthan dih. Bia ttha tein a kan ruah ko. Tlerhkhawnnak a um lo. Kan in ngaihthiam hna. Nan duhmi nan langhter cang. Lam zong nan zawh cang. Thaizing zung tu rak kan tthan u a kan ti,” tiah tuzan lei an auhmi hna kong he pehtlai in a chim chap.

“Cun, midang cu duhlonak an langhter zong ah hman an i thla i a za ko. Asinain, nannih cu lamzawhnak ah nan vun i tel tik ah social media ah a kai dih. Cucaah, cunglei zungpi zong nih nan kut tang pawl zeitin an si, nan zoh kho hna lo. Zeitindah nan tuah cang hna tibantuk a kan hal ve, tiah an chim. Cun, thaizing nan rak kai tthan ah cun kan in maimilhpiak hna lai a kan ti” tiah a chim chap.

“Kan zung ah hin rian a lut kaa ngakchia deuh tete zong an um i ka lung cu a ttha lo ngai. Asinain, kan tuah cangmi cu a dongh tiang kalpi ding in kan i timhtuah…nan i ngaichih maw ka ti hna i, kan i ngaichih lo an ka ti dih. Cucaah, thaizing hi cu kai lo ding in kan in timh rih ko,” tiah a chim.

CDM a tuahmi pawl hi rian ngei lo dirhmun tiang a phan khomi an si nain “Nan thinphang hlah u, Hakha Mino nih a kan dirkamh ko” tiah thazaang an i pe i thaizing zong pehzul in CDM tuah an tim.

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.