Thaizing Lamzawh Kong ah Myanmar Ralkap le US nih Ralrinnak Pek

| The Chin Journal | Hakha, Chin State

Thaizing (February 22) Myanmar ramchung lamzawhnak kong he pehtlai in US cozah nih Myanmar ram um US rammi pawl ralrin peknak bia a cah hna bang in uknak chuttu Myanmar ralkap zong nih MRTV hmang in ralrin peknak bia an chim ve.

Thaizing hi Myanmar ram huap piin lamzawhnak ngan bik tuah ding in online ah hrihawhnak pawl a hun um len cang i Yangon khuachung Shopping Mall ngan bikbik hna zong nih Feb. 22 cu kan khar chung lai tiah thawngthanhnak an tuah hna.

US cozah nih, “February 22 ah Myanmar ram huap in lamzawhnak a um lai timi thawngpang a len caah Myanmar ram um US rammi pawl leng chuah lo rak i zuam uh,” tiah ralrinnak bia a cah hna.

Cun, nihin zalei ah MRTV hmang in uknak chuttu Myanmar ralkap nih, “Democracy phungphai ning ah zalong tein lamzawhnak tuah khawh a si ko. Asinain, upadi ning loin midang thlerhkhawnnak le lamzawhnak ah i tel ding in hramhram i hneknak tibantuk a um ahcun fak piin dantatnak kan tuah lai,” tiah thawng an thanh.

February 22 hi Kawlholh in ၂ ငါးလုံးအရေးတော်ပုံ (22, 2, 2021) tiah min pek a si i Myanmar ram huap piin lamzawhnak nganpi tuah ding in timhtuah a si.

Yangon ah cun Lanmadaw ah a ummi BEHS No. 1 sianginn tual chung ah ralkap motor pawl atu zanlei in hmunhma an la cang.

February 1 ah Myanmar ralkap nih NLD kut cung in uknak a chuh hnu ah Myanmar ram huap in duhlo lamzawhnak a chuak i, atu tiang ah minung 4 nunnak a liam cang.

February 9, Naypyidaw lamzawhnak ah kum 19 a simi Ma Myah Thwe Thwe Khaing cu palik nih a lu ah meithal in an kah ruang ah a nunnak a liam.

February 20, Mandalay khua i ralkap uknak duhlo langhter hmun ah palik nih meithal in pa pahnih an kah chap hna caah an nunnak a liam ve.

Cun, February 20 zaan sml. 11:00 hrawng Yangon ramtthen, Shwe Pyi Tha ah sang chung runvennak a tuahmi pa cu a kal cuahmahmi palik motor cung in an rak kah caah a nunnak a liam ve.

Cherhchan: BBC

Latest News

News in Burmese