TCJ Thawngpang a La Chintu hna Zulh Ding

Biahmaitthi

The Chin Journal (TCJ) cu zei bantuk bu he hmanh pehtlaihnak a ngei lomi Private News Agency a si i, kan Lai Media zatlang zoh dawh tein le ningcang tein a kal khawh nakhnga aa zuam zungzalmi kan si.

TCJ nih Chin (Lai) thawngpang kan tarmi pawl hi kanmah TCJ rianttuantu Reporters pawl nih thazaang, chawva le caan tampi chuah in an lakmi Original News pawl an si hna.

Cucaah, website in online ah ca a tartu hna zong nih TCJ chungtel hna rianttuannak hi upat bu tein kan thawngpang pawl hi ningcang tein nan lak a herh ve.

Breaking News

TCJ nih kan tarmi Breaking News pawl hi caan tampi ah cun a cang cuahmahmi (Developing Story) an si i, update kan tauh chapmi tete a um tawn.

Cucaah, Website catartu hna nih voi khat nan hmuhnak i nan copy i Group ah nan tarmi kha i rinh loin update kan tuahmi a um le um lo kan Page ah rak kan checkpiak tthan lengmang u.

Hmanthlak (Copyright)

TCJ nih Hakha le Thantlang thawngpang kan tarmi ah kan hmanmi hmanthlak tam deuhpi hi kanmah original hmanthlak an si hna.

Cucaah, hmanthlak nan lak i nan hman tik ah TCJ hmanthlak a sinak (Photo: The Chin Journal) nan langhter zungzal.

TCJ hmanthlak kan tarmi nan lak tik ah original muisam tlau tiang in nan Edit chap lai lo.

Thawngpang (Copyright)

TCJ kan thawngpang pawl nan lak tik ah Credit pek duh lo phun in cabia dang in nanmah lakmi thawngpang bang in nan ttial chin (Paraphrase) lai lo.

Nan copy tik ah ahmater kan ttialmi tlangtar nan thleng lai lo, Adverb (bak, tuk, taktak tbk.) tibantuk biafang pawl porh hlei in nan telh lai lo.

Kan tar ning tein a muisam le a sullam tlau hrimhrim lo ding in nan tar chin ve lai.

Thawngpang le Hmanthlak Hnawh Thanmi

Cun, thawngpang le hmanthlak kan tarmi kong ah atulio thil sining hoih in mipi humhimnak a hnorsuan deuh a si ahcun khulrang in kan hnawh tthan tawnmi an um.

Cu bantuk kan hnawh tthanmi pawl cu Website ngeitu hna zong nih Group i nan tarmi vialte nan hnawh dih a herh ve pin ah nan Website chung zong in nan thianh dih a herh fawn.

TV News & Vlogger pawl Zulh Awk

Chinmi chung in online ah video in thawngpang a chim chintu hnanih TCJ thawngpang nan chim tik ah TCJ thawngpang a sinak nan langhter zungzal lai. Tahchunhnak: “…The Chin Journal nih a ttial,” tibantuk in.

Nan video ah kan photo/video clip nan telh tik ah “The Chin Journal” timi nan ttial chih zungzal lai.

Upatnak He,

The Chin Journal (Tilim News Agency)

Hakha, Chin State

Phone-09445672734

Latest News

News in Burmese