Tanintharyi Kong Thawngpang Tial Ruang ah RFA Thawngzamhca Tazacuai an Timh

| The Chin Journal | Hakha, Chin State

Tanintharyi ramthen, Meik khua donhhlei 4 sernak ca i tangka cu Chief Minister hlun Dr. Lay Lay Maw, Financial Vuanci U Phyo Win Htun le Sipin chairman U Myat Ko Ko nih a cheuchum an i lak tiin RFA langhtermi thawngpang hi a dikhmaan lomi a si caah ngaihthiam an kan hal lo a si ahcun taza kan cuai hna lai tiah an chim.

Hi kong he pehtlai in thil sining fianternak cu March 13 ah Meik khua Sipin zung ah an tuah i Lam lei zung, Company pawl, sang khuabawi pawl le khuanu khuapa an sawm hna.

March 11, RFA thawngzamh nih a langhtermi chung ah “Ks. 1.9 Billion lam lei zung an pek hna i a miakmi tangka cu Chief Minister, Financial Minister le Sipin Chairman an i tthenphaw” tiin sual an kan puh tiah Sipin Chairman U Myat Ko Ko nih a chim.

“Ks. 1.9 Billion chung in donhhlei sernak i a miakmi pawl an i tthenphaw tiah an hmanmi biafang hi thawng dik lo an zamhmi a si” tiah Meik khua media hna biahalmi chung in U Mayt Ko Ko nih a chim.

“Online cung an langhtermi hi a dikhmaan lomi a si, donhhlei sernak rian hi ramthen cozah nih ramthen lam lei zung ah tuanvo pekmi a si. Ahohmanh a miak i tthenhphawt a um lo” tiah Meik pengkulh lam lei zung lutlai U Thein Aung nih a chim.

Hi kong he pehtlai in Meik kong a tialtu RFA Reporter Kyaw Lwin Oo nih “Ka tialmi thawngpang kong he pehtlai in U Myat Ko Ko nih ralrin peknak le theihternak a ka tuah rih lo. Pakhatkhat buaibainak a chuah a si ahcun zung i a ummi Editor te he ceihhmainak an ngei te lai” tiah a chim.

-Mizzima

Latest News