Tahan Mizo Nu Kuatmi Ritsii $2.9million Man Chinram-Mizoram Ramri ah an Tlaih

| The Chin Journal | Hakha, Chin State

Kalaymyo in India ram lei ah kuatmi rithaisii $2.9 million man cu Chinram-Mizoram ramri khua pakhat ah July 17 ah khan an tlaih, tiah theih a si.

July 17, zan sml. 7:00 hrawng ah Chin ramkulh le Mizoram ramri, Mizoram chung a simi Serchhip district, Sailulak khuate ah ritsii (Methamphetamine) tlang 600,000 an tlaih hi a si.

Myanmar lei in a rung lutmi Pick-up motor pakhat cu Sailulak khua upa hna, Young Mizo Association (YMA) in mino upa hna le palik pawl i bawm in an kham i an check tikah hminphekcar chung ah an thuhnawh chihmi ritsii pawl an hmuh hna.

Ritsii tlang 600,000 a phortu Assam ramkulh ah a ummi India rammi paruk zong an tlaih chih hna.

Hi ritsii tlang 600,000 hi atulio India tangka in Rs. 20 Crore man a si i, US Dollar in cun $2.9 million hrawng a si. Mizoram tuanbia ah a ngan bikmi ritsii tlaihnakpi a si.

Ritsii a phortu minung paruk lak ah tuanvo ngeitu bik pa Sujit Uddin (kum 23) hi Sailulak khua ah inn hlan in Chinram, Dawn khua ah hminphekcar a lami a si.

Asinain, ramri a luhchuah ningcang pawl an rak ngiat zungzal tik ah an lung a hring i hminphekcar a phorhnak motor an kham tik ah atu bantuk in ritsii tampi an tlaihnak hi a si.

Palik pawl nih tlaihmi minung paruk cu bia an hal hna tikah, “Hi ritsii pawl hi Kalaymyo, Tahan ah a ummi Pi Liani ta a si,” tiah an phuan.

-Eastmojo News

Latest News