Taang-10 Siangngakchia Pa an Sayapa Nih Thi Lak in a Vuak

| The Chin Journal | Hakha, Chin State

Pakistan ram, Lahor khua i “American Lycetuff School” timi private sianginn ah taang-10 a cawng liomi tlangval no Hafiz Hunain Bilal cu September 5 ah khan an sayapa nih class chung ah thi lak in a velh, tiah theih a si.

Chun sml. 11:50 ah cachimh ding in an sayapa cu a rung lut. Siangngakchia pawl ca zahtermi hna a hal hna.

Asinain, Bilal hi ca a zah lo pin ah cauk zong a philh. Cucaah, an sayapa nih a lut, a paw le a hnakpang ti bantuk ah fak piin a thongh.

Bilal he khaan khat a simi pa pakhat nih, “Sayapa nih a lu ah a thongh. Cun, a hnakpang le a paw ah a thongh chap. Bilal nih ka thaw ka chuah kho lo tiah sayapa cu a nawl. Asinain, sayapa nih na titer tih tiah a leh. A sam in a tlaih i a lu vanpang ah a khawn. Cu hnu cun Bilal cu a tlu i mah hngal loin a um,” tiah a chim.

A nunnak a liammi Hafiz Hunain Bilal (Kehlei) le thi lak in class chung ah a vuatu an sayapa (Orhlei)

Bilal cu sizung an phakpi tlawmpal ah a nunnak a liam. Bilal a farnu Rimsha Naeem nih, “Ka tapa cu American Lycetuff School khaan chung ah a sayapa nih thi lak in a vuak” tiah Twitter ah ngaihchiatnak a tial ve.

Bilal thi lak in a vuatu sayapa hi atu bantuk in siangngakchia vuak a hman caah American Lycetuff School in an rak phuah balmi a si. Asinain, thla 6 a rauh hnu ah saya tuan ding in an lak than.

Cu sayapa cu September 5 thotho ah palik nih an tlaih cang i pohma 302 le pohma 32 in case on a si.

Bilal a thih kong ah Lahor ah a ummi siangngakchia pawl nih bia hmaan tein chahpiak ding in September 7 ah lamzawhnak an tuah i, Bilal a thihnak American Lycetuff School zong mei in an khangh.

American Lycetuff School hi Pakistan ram ah 1996 ah an rak onmi a si i, atu ah cun Pakistan ramchung ah sianginn 80 leng an on. Turkey zong ah sianginn on chap ding in timhtuahnak an ngei.

-India Today, Pakistan Today

Latest News