Syria in US Ralkap Chuah Ding Evangelical Upa Pawl Lungtling Lo

| The Chin Journal | Hakha, Chin State

Syria ram ah ISIS ralhrang dohnak a dih cang caah US President Donald Trump nih US ralkap pawl Syria ram in chuah cang ding in thawng a thanhmi cung ah US ramchung Evangelical Khrihfa hruaitu lei upa pawl an lung a tling lo ngaingai, tiah theih a si.

US ralkap an chuah dih lecangka in Turkey nih Kurd hriamtlai pawl doh ding in Syria-Turkey ramri ah luh a timh colh caah US President Trump biachahnak cung ah amah Republican party chungtel lila zong an lung a tling lo ngai.

Turkey nih doh a timhmi Kurd hriamtlai YPG (Syrian Democratic Force-SDF tang ah a ummi) hi ISIS ralhrang dohnak ah US he biatak tein aa bawmmi an si. Syria rialdip uktu Assad dohnak zong ah SDF hi US nih biatak tein a rak dirkamhmi a si fawn.

Atu ah Turkey nih YPG cu a duh tawk in phomh ko seh ti phun in US nih chuahtak a timh tik ah US cu leirawitu dirhmun bantuk in a hmutu zong an um.

US ah awann a ngei ngaimi Evangelist Pat Robertson nih, “Syria nichaklei ah a ummi Democratic Forces pawl hi US nih kan leirawi ko hna lai maw? Turkey nih kan hawi Kurd pawl hi an duhtawk in phomhnak nawl kan pe ko hna lai maw?” tiah biahalnak a tuah.

Hlanlio Arkansas Republican governor le Baptist pastor a rak simi Hukabee nih, “Syria i Democratic Forces hriamtlai nih hin raldoh kan bawm u tiah a rak kan ti ballo. Ralhriam tu kan bawm u law kanmah tein kan doh lai a kan ti. A ngaingai ah US caah zumhtlak hawikom an si. Atu bantuk in olzaang tuk in kan hlonh hna awk a si lo,” tiah a chim ve.

Family Research Council ah Vice President a simi Travis Weber nih, “Kanmah he a ttang ttimi kan hawi kan hlawt a si ahcun hmailei ah ahohmanh nih kanmah he ttan tti an duh ti lai lo,” tiah ralrin peknak bia a chim ve.

Sihmanhsehlaw, President Trump nih cun, “Syria ah hin a dang ram nakin US nih fak khun rian kan tuan. ISIS dirhmi Caliphate a rawh nakhnga US nih 100% in a tuan cang. Cucaah, atu cu mahka hmunram ah a ummi hna nih anmah tein an hmunram an i kilven ve caan a si cang,” tiah a chim.

-The Christian Post

Latest News