Syria in US Ralkap an Chuah Lecangka in Turkey nih Kurd Hriamtlai a Phomh Colh Hna

| The Chin Journal | Hakha, Chin State

US President Donald Trump nih Syria ram nichuah-chaklei in US ralkap a chuahter hna lecangka in Turkey nih Kurd hriamtlai Syrian Democratic Forces (SDF) pawl a luh hnawh colh ve hna.

October 9 thawk khan Turkey-Syria ramri ah a ummi SDF pawl cu Turkey nih Lei le Van in a den hna. Rammi a nunnak a liammi zong an um, tiah CNN nih a langhter.

SDF pennak tang ah a rak ummi Ras al Ain khua in minung a thongthong cu Hasaka peng lei ah an zaam hna.

SDF hi Syria rialdip uktu Assad cozah a dotu le ISIS ralhrang a dotu an si i, US nih bawmhnak a rak pekmi hna an si.

ISIS ralhrang dohnak ah US he an ttangrual tti nain US nih atu bantuk in a hun chuahtak tik ah Republican party chungtel tampi le American Evangelical upa tampi an lung a tling lo ngaingai. Kan hawikom tha a simi kan leirawi hna awk a si lo tiah President Trump sual an phawt.

Sihmanhsehlaw, President Trump nih cun, “Syria ah hin a dang ram nakin US nih fak khun rian kan tuan. ISIS dirhmi Caliphate a rawh nakhnga US nih 100% in a ttuan cang. Cucaah, atu cu mahka hmunram ah a ummi hna nih anmah tein an hmunram an i kilven ve caan a si cang,” tiah a chim.

-Reuters

Latest News