Surbung Vanlawng Bual Cu Vice President nih Ramkomh President Surbung ah a Kalpi Hnu ah Ser Ding in Fehtermi a Si

| The Chin Journal | Hakha, Chin State

June thla ah onnak tuah ding in an ttuan cuahmahmi Surbung vanlawng bual cu Myanmar Vice President Pu Henry Van Thio nih Myanmar President U Htin Kyaw (Aa din cangmi) kha Surbung ah pumpak in a rak kalpi hnu ah ramkomh cozah nih tuah ding in fehternak/approve a rak tuahmi a si, tiah ttuanvo ngeitu hna sin in thawng kan theih.

Chinram ah vanlawng bual ser ding timi hi CNF le U Thein Sein cozah karlak remdaih hnatlaknak tuah lio ah CNF nih an rak hal hmasa. Khoika ngaingai ah tuah ding timi bel chimrel a rak um lo.

U Thein Sein cozah chan donghlei 2015 le 2016 ah Survey/hlathlainak tiang cu an rak tuah i, Ramkomh cozah (Cabinet) nih vanlawng bual tuah ding in a rak fehter kho rih lo.

Caan karlak ah kan Chin NLD MP chung in Pi Ni Sui Lian tibantuk zong nih Hluttaw ah Chinram ah vanlawng bual tuah ding in timhlamhnak a um le um lo kong an rak hal tawn.

Surbung vanlawng bual nih hin cozah ca ah sipuazi lei in amiak a chuahpi ding a um lo. A sung bak in ttuan ding a si tik ah Pyidawngsu vuanci pawl karlak ah a lungtling lomi an um len.

Surbung vanlawng bual sernak kong ah ttuanvo ngeitu Aerodrome Standards and Safety Division ah Director a simi U Kyaw Soe nih, “Surbung vanlawng bual hi amiak ruahchannak um lo bak in tuahmi a si. Chinram cu lamsul a harsat tuk ruang ah Chinmi tthanchonak ca hrimhrim ah an tuahmi a si,” tiah a chim.

“Hakha peng, Thantlang peng le Tedim peng zong ah vanlawng bual ser nakding hmunhma kan rak zoh i Falam peng i Surbung hi a ttha bik a si caah kan thimmi a si,” tiah U Kyaw Soe nih January 16 i Yangon um Chin Media hna sin Surbung vanlawng bual kong fianternak ah a langhter.

Vanlawng bual tuah ding in fehter hlan ah Vice President Pu Henry Van Thio pumpak in Surbung ah voi khat a rak kal hnu ah a voi 2nk ah Myanmar President U Htin Kyaw cu a rak i roih i, Surbung ah a kalpi.

Cu dih cun Cabinet nih a ceih i, June 22, 2017 ah Surbung vanlawng bual hi tuah siseh, tiah lungtlinnak an rak ngei.

Chinram ah vanlawng bual a um nakhnga Key Players pawl lak ah Vice President Henry Van Thio, CNF, Chin MP pawl, Chin ramkulh cozah, Laitlang khuanu khuapa hna le U Thein Cozah tiang in an i tel dih hna.

Surbung Vanlawng bual cu 75.5% tiang lim a si cang i Budget 34.19 billion nih tlamtling in a sak khawh lai, tiah U Kyaw Soe nih a chim.

May 2020 ah lim ding in timhtuahmi Matupi peng Lailenpi vanlawng bual hi MAF bawmhnak in ser cuahmahmi a si i, Myanmar cozah lei zong nih Technical Support a pekmi a si.

Lailenpi vanlawng bual rak ser ding in Myanmar cozah sin ah nawl an rak halmi fawilebai in pek a si ti lo caah Vice President Henry Van Thio thotho nih a tlangtlakpi hna i cu hnu cun cozah nawl onnak hmuh a rak si.

Tu kum chung ah Chinram ah on dingmi Surbung vanlawng bual ah hin ATR 72 vanlawng a ttum kho lai i, Lailenpi vanlawng bual ah hin minung 9 in 14 tiang hrawng cit khawhmi Cessna 208 vanlawng a ttum kho ve lai.

Surbung ah a ttum te dingmi Airline kong he pehtlai in U Kyaw Soe nih, “Vanlawng bual sernak rian 90% a dih hnu ah Myanmar ramchung Airline panga he ceihhmainak kan ngei te lai. Cu hnu cu zei Airline dah Chinram ah a phan lai timi a fiang lai. Asinain, Myanmar National Airline hi cu Surbung ah a ttum te lai timi a fiang pah ko,” tiah a chim.

Latest News

News in Burmese